သီလဝါအထူးစီးပွားရေးဇုန်တွင် နိုင်ငံခြားရင်းနှီးမြှုပ်နှံမှုပမာဏ ကန်ဒေါ်လာ ၇၉ သန်းကျော် လျော့ကျ
ရန်ကုန် စက်တင်ဘာ ၁၅
ယခုဘဏ္ဍာနှစ် ၁၁ လအတွင်း သီလဝါအထူးစီးပွားရေးဇုန်တွင် နိုင်ငံခြားရင်းနှီးမြှုပ်နှံမှုပမာဏ အမေရိကန်ဒေါ်လာ ၁၄၂ သန်းကျော်ရရှိထားပြီး ယခင်နှစ်ကာလတူနှိုင်းယှဉ်ပါက ၇၉ သန်းကျော် လျော့ကျခဲ့ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန (DICA) ၏ စာရင်းများအရ သိရသည်။
လက်ရှိ ၂၀၁၉-၂၀၂၀ ဘဏ္ဍာနှစ်၊ အောက်တိုဘာ ၁ ရက်မှ သြဂုတ် ၂၈ ရက်အထိ နိုင်ငံခြားရင်းနှီးမြှုပ်နှံမှု ခွင့်ပြု/အတည်ပြုပေးခဲ့သည့် လုပ်ငန်း ၆ ခုမှ ရင်းနှီးမြှုပ်နှံမှုပမာဏ အမေရိကန်ဒေါ်လာ ၁၄၂ ဒသမ ၂၉၇ သန်း ရရှိထားပြီး ပြီးခဲ့သည့် ၂၀၁၈-၂၀၁၉ ဘဏ္ဍာနှစ် ကာလတူတွင် နိုင်ငံခြားရင်းနှီးမြှုပ်နှံမှု ခွင့်ပြု/ အတည်ပြု ပေးခဲ့သည့် လုပ်ငန်း ၁၆ ခုမှ ရင်းနှီးမြှုပ်နှံမှုပမာဏ အမေရိကန်ဒေါ်လာ ၂၂၁ ဒသမ ၄၃၀ သန်း ရရှိခဲ့သည်။
သို့ဖြစ်၍ ယခုဘဏ္ဍာနှစ်အတွင်း နိုင်ငံခြားရင်းနှီးမြှုပ်နှံမှု ခွင့်ပြု/ အတည်ပြုပေးခဲ့သည့် လုပ်ငန်းမှာ ပြီးခဲ့သည့်နှစ် ကာလတူထက် လုပ်ငန်း ၁၀ ခု လျော့နည်းခဲ့သည့်အပြင် ရင်းနှီးမြှုပ်နှံမှုပမာဏမှာလည်း အမေရိကန်ဒေါ်လာ ၇၉ ဒသမ ၁၃၃ သန်း လျော့ကျခဲ့ကြောင်း သိရသည်။
သီလဝါအထူးစီးပွားရေးဇုန်တွင် စက်မှုကဏ္ဍ၊ ကုန်စည်ရောင်းဝယ်ရေးကဏ္ဍ၊ အိမ်ရာနှင့်အဆောက်အအုံ တည်ဆောက်ဖွံ့ဖြိုးမှုကဏ္ဍ၊ သယ်ယူပို့ဆောင်ရေးနှင့်ထောက်ပံ့ရေးကဏ္ဍ၊ ဝန်ဆောင်မှုကဏ္ဍနှင့် ဟိုတယ်ကဏ္ဍတို့ရှိသော်လည်း ဘဏ္ဍာနှစ် နှစ်ခုစလုံးတွင် စက်မှုကဏ္ဍနှင့် ဝန်ဆောင်မှုကဏ္ဍတွင်သာ ရင်းနှီးမြှုပ်နှံထားသည်။
မေဘယ်လ်အောင်
