ပရီးမီးယားလိဂ်အဖွင့်ပွဲစဉ်ရဲ့ မှတ်တမ်းမှတ်ရာများ
စက်တင်ဘာ ၁၄
အဖွင့်ပွဲစဉ်ဘုရင်ကြီးမော်ရင်ဟို
မော်ရင်ဟိုဟာ ချဲလ်ဆီး၊ မန်ယူတို့ကိုကိုင်တွယ်ခဲ့စဉ် ပရီးမီးယားလိဂ် ရာသီအဖွင့်ပွဲစဉ် ၁၁ ပွဲ ယှဉ်ပြိုင်ခဲ့ ဖူးပါတယ်။ အဲဒီ ၁၁ ပွဲယှဉ်ပြိုင်ခဲ့ရာမှာ မော်ရင်ဟိုက ၉ ပွဲနိုင်၊ ၁ ပွဲသရေ၊ ၁ ပွဲရှုံးရလဒ်ပိုင်ဆိုင်ထားလို့ ပွဲစဉ်ဘုရင်ကြီးအဖြစ် တင်စားနိုင်ခဲ့ပါ တယ်။
အဖွင့်ပွဲ ပွဲတိုင်းနိုင် ဂွာဒီယိုလာ
မော်ရင်ဟိုထက် အဖွင့်ပွဲကိုလန်းတဲ့သူကတော့ မန်စီးတီးနည်းပြ ဂွာဒီယိုလာပါ။ ဂွာဒီယိုလာဟာ ပရီးမီးယားလိဂ်ပွဲစဉ် ၁ အနည်းဆုံး ၂ ပွဲအထက် ကိုင်ဖူးတဲ့နည်းပြတွေထဲမှာ အဖွင့်ပွဲစဉ်ပွဲတိုင်းနိုင်တဲ့တစ်ဦးတည်းသောနည်းပြဖြစ်ပါတယ်။ သူဟာ မန်စီးတီးနဲ့အဖွင့်ပွဲစဉ် ၄ ပွဲကိုင်တွယ်ခဲ့ရာမှာ ၄ ပွဲလုံးနိုင်ပါတယ်။
အဖွင့်ပွဲစဉ် ရမှတ်အများဆုံးနဲ့ အအောင်မြင်ဆုံးမန်ယူ
ပရီးမီးယားလိဂ်မှာ အအောင်မြင်ဆုံးဖြစ်တဲ့မန်ယူဟာ အဖွင့်ပွဲစဉ်ရမှတ်အများဆုံးရ အသင်းဖြစ်ပါတယ်။ မန်ယူဟာ ခေတ်သစ်ပရီးမီးယားလိဂ် သမိုင်းမှာ အဖွင့်ပွဲစဉ် ၂၈ ပွဲကစားရာ ၆၁ မှတ်ရခဲ့တာကြောင့် အနိုင်ရာခိုင်နှုန်း ၆၇ ဒသမ ၉ ရာခိုင်နှုန်းရရှိခဲ့ပါတယ်။
အဖွင့်ပွဲစဉ်မှာ ရှုံးပွဲအနည်းဆုံးလီဗာပူး
မန်ယူနဲ့အတူ အအောင်မြင်ဆုံးဖြစ်တဲ့ လီဗာပူးဟာ ပရီးမီးယားလိဂ်အဖွင့်ပွဲစဉ်ရှုံးပွဲအနည်းဆုံးမှတ်တမ်းရရှိခဲ့ပါတယ်။ အဖွင့်ပွဲစဉ် ၂၉ ပွဲကစားရာမှာ ၁၇ ပွဲနိုင်၊ ၈ ပွဲသရေ၊ ၄ ပွဲသာ ရှုံးနိမ့်ခဲ့ပါတယ်။
အဖွင့်ပွဲစဉ် အကြီးမားဆုံးနိုင်ပွဲ ပိုင်ရှင်ချဲလ်ဆီး
ပရီးမီးယားလိဂ်အဖွင့်ပွဲစဉ်မှာ အကြီးမားဆုံးနိုင်ပွဲပိုင်ရှင်ကတော့ ချဲလ်ဆီးပါ။ ၂၀၁၀ အဖွင့်ပွဲမှာ ဝက်စ်ဘရွန်းကို ၆−၀ အနိုင်ရခဲ့ဖူးပါတယ်။
အဖွင့်ပွဲအရှုံးအများဆုံး ဝက်စ်ဟမ်း
ပရီးမီးယားလိဂ်သမိုင်းတစ်လျှောက်အဖွင့်ပွဲမှာ အရှုံးအများဆုံးအသင်းကတော့ ဝက်စ်ဟမ်းဖြစ်ပါတယ်။ ဝက်စ်ဟမ်းဟာ ပရီးမီးယားလိဂ်အဖွင့်ပွဲ ၂၄ ပွဲမှာ ၁၀ ပွဲထိနိုင်ခဲ့သော်လည်း ၁ ပွဲသရေ ၁၃ ပွဲရှုံးနိမ့်ခဲ့ပါတယ်။
(SO)
