မူဆယ်မြို့နယ်တွင် စိတ်ကြွရူးသွပ်ဆေးပြားများ ဖမ်းဆီးရမိ
မူဆယ် စက်တင်ဘာ ၄
စက်တင်ဘာလ ၃ ရက်နေ့ ၁၄၀၀ အချိန် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များသည် မူဆယ်မြို့၊ ကောင်းမူးတုံရပ်ကွက်ရှိတာဝါတိုင်အနီးတွင် ရန်တင်ဖာ မောင်းနှင်လာသော မော်တော်ဆိုင်ကယ်အား စစ်ဆေးရန်ရပ်တန့်ခိုင်းစဉ် မောင်းနှင်ထွက်ပြေးသဖြင့် လိုက်လံဖမ်းဆီးရာ ၎င်းထံမှ စိတ်ကြွရူးသွပ်ဆေးပြား ၂,၀၀၈ ပြားနှင့် လက်ကိုင်ဖုန်းတစ်လုံးတို့ကိုသိမ်းဆည်းရမိခဲ့သည်။
ဆက်လက်ပြီး ကွင်းဆက်အရ ညနေ ၄ နာရီခွဲအချိန် မန့်ဆာ-ခိုဝိန်းသွားကားလမ်းတွင် ကျန်ဇီဖင့်မောင်းနှင် လာသည့် မော်တော်ဆိုင်ကယ်အား ရပ်တန့်စစ်ဆေးရာ ဆိုင်ကယ်တူးဘောက်အတွင်းမှ စိတ်ကြွရူးသွပ်ဆေးပြား ၁၂,၀၀၀ ပြားနှင့် ၎င်းထံမှ လက်ကိုင်ဖုန်းတစ်လုံးတို့ကိုသိမ်းဆည်းရမိခဲ့သဖြင့် ရန်တင်ဖာ(၃၅)နှစ်၊ ကျန်ဇီဖင့်(၂၅)နှစ်တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သိရသည်။
ဆွေဦး
