PSG တို့ မက်ဆီကို ခေါ်ယူနိုင်ဖို့ သူ့ရဲ့ဖခင်ကိုချဉ်းကပ်
စက်တင်ဘာ ၁
ချန်ပီယံလိဂ်ဗိုလ်လုပွဲတက်ခဲ့တဲ့ PSG တို့ဟာ မက်ဆီကိုခေါ်ယူနိုင်ဖို့အတွက် သူ့ရဲ့ဖခင်လည်းဟုတ်၊ အေးဂျင့်လည်း ဟုတ်၊ မန်နေဂျာလည်းဟုတ်၊ တိုင်ပင်ဖော်တိုင်ပင်ဖက်လည်းဟုတ်တဲ့ ဂျော့မက်ဆီထံ ချဉ်းကပ်ခဲ့ကြပါတယ်။ မက်ဆီက ဘာစီလိုနာကနေ ထွက်ခွာလိုကြောင်းတောင်းဆိုလိုက်ရင်ပဲ သူ့ကိုလိုချင်တဲ့ ကလပ်တွေအများအပြားထွက်ပေါ်လာပါတယ်။
ဒီကလပ်တွေထဲမှာ ငွေကြေးကြွယ်ဝတဲ့ PSG လည်းပါဝင်လာပါတယ်။ ပြင်သစ်သတင်းစာ L’Equipe ရဲ့ အဆိုရဆိုလျှင် PSG ဒါရိုက်တာ လီယိုနာဒိုဟာ မက်ဆီဖခင်ဂျော့မက်ဆီထံ ဖုန်းဆက်မေးမြန်းခဲ့ကြောင်း ဂျော့မက်ဆီက သားဖြစ်သူဟာ မန်စီးတီးကိုသာပြောင်းရန် ဆန္ဒရှိနေတယ်လို့ ဖြေကြားခဲ့ပါတယ်လို့ သတင်း ရေးသားတင်ခဲ့ပါတယ်။ မက်ဆီဟာ ဆန္ဒရှိလျှင် ဘာစီကနေထွက်ခွာခွင့်ရရှိထားသလို ၂၀၂၁ ခုနှစ်ထိလည်း စာချုပ်ကရှိနေပါသေးတယ်။ စာချုပ်ထဲမှာက ပေါင်သန်း ၆၃၀ ပေးလျှင် ထွက်ခွာခွင့်ရှိတယ်ဆိုတဲ့သဘောတူညီချက်လည်းပါဝင်ပါတယ်။ မက်ဆီက အသင်းကနေ အလွတ်ကြေးနဲ့ထွက်ခွာချင်နေ၊ အသင်းကလည်းပြောင်းရွှေ့ကြေးရချင်နေပါတယ်။ သတင်းတွေအရဆိုရင် မက်ဆီအသင်းကနေထွက်ခွာခွင့်ရရေး ကလပ်နဲ့ တရားရင်ဆိုင်ရနိုင်တယ်လို့ သတင်းမှာဖော်ပြထားပါတယ်။ မက်ဆီဟာ ဆရာဟောင်း ဂွါဒီယိုလာဆီကို ပြောင်းရွှေ့လိုနေပါတယ်။ ဘာစီမှာ ဂွါဒီယိုလာနဲ့လက်တွဲခဲ့စဉ်က လေးနှစ်တာကာလမှာ လာလီဂါဖလားသုံးလုံး၊ ချန်ပီယံလိဂ်ဖလားနှစ်လုံး၊ ကလပ်ကမ္ဘာ့ဖလားချန်ပီယံနှစ်လုံး ဆွတ်ခူးခဲ့ပါတယ်။ မက်ဆီဟာ ဘာစီမှာ ၁၆ နှစ်ကာလအတွင်း ၇၃၁ ပွဲကစား ၆၃၄ ဂိုးသွင်းခဲ့ကာ ဖလားစုစုပေါင်း ၃၃ လုံးရရှိခဲ့ပါတယ်။
(SO)
