လမ်းလျှောက်လာသူထံမှ မူးယစ်ဆေးနှင့် ဓားတစ်လက်တွေ့၍ အမှုဖွင့်အရေးယူ
စစ်ကိုင်းတိုင်းဒေသကြီး၊ ကသာခရိုင်၊ ကသာမြို့နယ် ရဲစခန်းတောင်ဘက်ငါးမိုင်ခန့်အကွာ အောက်ဝဲ ကြီးကျေးရွာ သွပ်မိုးတံတားအနီး လမ်းလျှောက်လာသူထံမှ မူးယစ်ဆေးအပြင် လက်နက်ပါရှာဖွေတွေ့ ရှိခဲ့ကြောင်းသိရသည်။ ဖြစ်စဉ်မှာ မတ် ၂၈ ရက်၊ ည ၁ဝ နာရီ ၄၅ မိနစ်တွင် ကသာမြို့မရဲစခန်းမှ နယ်ထိန်းခေါင်းဆောင် ဒုရဲအုပ်ဇော်မင်းထွန်းနှင့်အဖွဲ့သည် မူးယစ်ဆေးဝါးသတင်းအရ သက်သေများနှင့်အတူ ကသာမြို့နယ် အောက်ဝဲကြီးကျေးရွာအရှေ့လမ်းမပေါ် သွပ်မိုးတံတား မော်တော်ဆိပ်အနီးတွင် စောင့်ဆိုင်းနေစဉ် ယင်းလမ်းမပေါ်သို့ မော်တော်ဆိပ်ကမ်းဘက်မှ တစ်ဦးတည်းလမ်းလျှောက်လာသူ ချိုမြိုင်(ခ)မောင်ချိုအားစစ်ဆေးရာ ဝတ်ဆင်ထားသော ပုဆိုးယာဘက် ခါးကြားလိပ်အတွင်းမှ ပင်နီဆီလင်ပုလင်းဖြင့်ထည့်လျက် ဘိန်းဖြူဟုယူဆရသော ဖြူ/ဝါရောင်အမှုန့် သုည ဒသမ ၂ ဂရမ်အားရှာဖွေတွေ့ရှိပြီး လွယ်ထားသော လွယ်အိတ်အတွင်းမှ အသွား ၁ဝ လက်မ၊ အရိုး ၆ လက်မခန့်ရှိ ဓားတစ်လက်အားတွေ့ရှိရသဖြင့် အရေးယူပေးပါရန် ဒုရဲအုပ်ဇော်မင်းထွန်းက တရားလိုပြုတိုင်တန်းသောကြောင့် ကသာ ရဲစခန်းမှ တရားခံချိုမြိုင်(ခ)မောင်ချို(၃၅)နှစ် ကြာအင်းရွာ၊ အောက်ဝဲကြီးအုပ်စု ကသာမြို့နယ်နေသူအား မယ(ပ)၆ဝ/၂ဝ၂ဝ၊ မူးစိတ်ပုဒ်မ ၁၆(ဂ)ဖြင့် အရေးယူသည့်အပြင် (ပ)၈၇/၂ဝ၂ဝ၊ လက်နက်ပုဒ်မ ၁၉(င) တို့ဖြင့် အရေးယူထားကြောင်း သိရသည်။ မိုးခါး
