ကွမ်းခြံကုန်းမြို့နယ်တွင် ဝင်ရောက်ယှဉ်ပြိုင်မည့် လွှတ်တော်အသီးသီး၏ ကိုယ်စားလှယ်လောင်းစာရင်းများကို ထုတ်ပြန်ကြေညာ
ကွမ်းခြံကုန်း ဩဂုတ် ၃၁
၂၀၂၀ ပြည့်နှစ်၊ နိုဝင်ဘာ ၈ ရက်တွင် ကျင်းပမည့် ပါတီစုံဒီမိုကရေစီအထွေထွေရွေးကောက်ပွဲကြီးတွင် ရန်ကုန်တိုင်းဒေသကြီး၊ တောင်ပိုင်းခရိုင်၊ ကွမ်းခြံကုန်းမြို့နယ်ကိုယ်စားပြုလွှတ်တော်မဲဆန္ဒနယ်အသီးသီး တွင် ဝင်ရောက်ယှဉ်ပြိုင်အရွေးခံမည့် လွှတ်တော်ကိုယ်စားလှယ်လောင်းများ၏ အမည်စာရင်းကို ဩဂုတ် ၃၀ ရက်၊ နံနက်ပိုင်းမှစ၍ အများပြည်သူများသိရှိနိုင်ရန် တော်ပုလွဲရပ်ကွက်ရှိ မြို့နယ်ကော်မရှင်အဖွဲ့ခွဲရုံးရှေ့တွင် ကပ်ထားကြေညာခဲ့ကြောင်း သိရသည်။
ကွမ်းခြံကုန်းမြို့နယ်တွင် ၂၀၂၀ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲကြီး၌ ပါဝင်ယှဉ်ပြိုင် အရွေးချယ်ခံမည့် ပါတီပေါင်း ၅ ပါတီရှိပြီး မဲဆန္ဒနယ်မြေအလိုက် လွှတ်တော်အသီးသီးတွင် ဝင်ရောက်အရွေး ချယ်ခံမည့် ကိုယ်စားလှယ်လောင်း ၁၈ ဦးရှိကြောင်း သိရသည်။
ထို့အပြင် တိုင်းရင်းသားလွှတ်တော်ကိုယ်စားလှယ်လောင်း ၁၃ ဦးရှိပြီး အဆိုပါကိုယ်စားလှယ်လောင်း များ၏ အမည်စာရင်းကို သက်ဆိုင်ရာရပ်ကွက်၊ ကျေးရွာကော်မရှင်အဖွဲ့ခွဲရုံးများတွင် ကပ်ထားကြေညာပေးသွားမည်ဖြစ်ကြောင်း သိရသည်။
ထွန်းထွန်းစိုး(ပြန်/ဆက်)
