လက်ရှိသင်ရိုးသစ် သတ္တမတန်းမြန်မာစာကျောင်းသုံးစာအုပ်ပါ အင်းလေးကန်ဆိုင်ရာအချက်အလက်များနှင့်ပတ်သက်၍ ပြင်ဆင်သင်ကြားပေးရန် စီမံဆောင်ရွက်ပေးသွားမည်
နေပြည်တော်၊ ဩဂုတ် ၃၀
လက်ရှိသင်ရိုးသစ် သတ္တမတန်းမြန်မာစာကျောင်းသုံးစာအုပ်ပါ အင်းလေးကန်ဆိုင်ရာအချက်အလက် များနှင့်ပတ်သက်၍ တိုင်းရင်းသားလူမျိုးများရေးရာဝန်ကြီးဌာန၊ တိုင်းရင်းသားစာပေနှင့် ယဉ်ကျေးမှု အဖွဲ့များ၊ ဒေသခံပြည်သူများကလက်ခံနိုင်သည့် အချက်အလက်များဖြစ်စေရန် စိစစ်ပြင်ဆင်ကာ ထပ်မံ ပြင်ဆင်ပုံနှိပ်သွားမည်ဖြစ်ပြီး လက်ရှိပုံနှိပ်ပြီးစာတွင်ပါသည့် အကြောင်းအရာများကိုလည်း ပြင်ဆင်သင်ကြား ရန် စီမံဆောင်ရွက်ပေးမည်ဖြစ် ကြောင်းပညာရေးဝန်ကြီးဌာန သတင်းများအရသိရသည်။
ပညာရေးဝန်ကြီးဌာနအနေဖြင့် အခြေခံပညာအလယ်တန်းအဆင့် သင်ရိုးအသစ်သတ္တမတန်း မြန်မာစာကျောင်းသုံးစာအုပ်တွင်ပြဋ္ဌာန်းထားသောနောင်အင်းလေးကိုလာဖို့ဖိတ်ခေါ်တယ် ခရီးသွားဆောင်းပါးသည် သင်ရိုးဟောင်းဆဋ္ဌမတန်း မြန်မာစာကျောင်းသုံးစာအုပ်ပါ အင်းလေးကန်ဆောင်းပါးကိုအခြေခံပြီး ပြင်ဆင်ပြုစု ခဲ့ခြင်းဖြစ်သည်။ အဆိုပါဆောင်းပါးအားအင်းလေးကန်၏သုတရသပါသောခရီးသွားဆောင်းပါးအဖြစ် သင်ရိုးသစ် ၏ ဦးတည်ချက်နှင့်လျော်ညီစွာ ပြုပြင်ရေးသားဆောင်ရွက်ခဲ့သည်။ ထိုသို့ဆောင်ရွက်ရာတွင်သင်ခန်းစာ ရေးသား သူများအနေဖြင့် သင်ခန်းစာဟောင်းမှ အချက်အလက်အချို့ကိုအခြေခံ၍လည်းကောင်း၊ ဆောင်းပါးအချို့မှ အချက်အလက်များကို မှီငြမ်း၍ လည်းကောင်း၊ ခေတ်နှင့်လျော်ညီပြီး ရသသဘောပါအောင် ပြန်လည်ပြင်ဆင် ရေးသားခဲ့ခြင်းဖြစ်သည်။
သို့သော် အကြောင်းအရာ၊ အသုံးအနှုန်းကွဲလွဲချက်များရှိနေသဖြင့် အဆိုပါကွဲလွဲချက်များနှင့်ပတ်သက် ၍ သရုပ်ဖော်ပုံကို အင်းသားဝတ်စုံအပြည့်အစုံနှင့် ပြန်လည်ပြင်ဆင် ဆောင်ရွက်ပေးသွားမည်ဖြစ်သည်။ ထို့အပြင် ရွာကြီးလေးရွာအမည်များနှင့်ပတ်သက်၍လည်း အများလက်ခံနိုင်သည့် အမည်ရှိမှစိစစ်ညှိနှိုင်းဖော်ပြရန် စီစဉ်ထားသည်ဟု ဆိုသည်။ ထို့အတူ ရှမ်း၊ ပအိုဝ်း၊ ဓနု၊ တောင်ရိုးစသည့် တောင်ပေါ်သားများသည် အင်းသားလူမျိုးနှင့်အတူ အင်းလေးကန်ကိုခြံရံပြီး နေထိုင်ကြကြောင်းကိုလည်း ဖြည့်စွက်ဖော်ပြရန်ရှိသည်။ အင်းလေးကန်ထဲမှစီးထွက်သည့်ချောင်းအမည်ကိုလည်းဘီလူးချောင်းဟုညှိနှိုင်းပြင်ဆင်ရန်ညှိနှိုင်းဆောင်ရွက်ပေးမည်ဖြစ်သည်။ အင်းတိုင်းရင်းသားအစားအစာများကိုလည်း အခေါ်အဝေါ်မှန်ကန်အောင် ပြန်လည်ပြင်ဆင်ဆောင်ရွက်ပေးမည်ဖြစ်ကြောင်း သိရသည်။
ရွှေဒုံသစ္စာ
