ပဲခူး၊ ဩဂုတ် ၂၉
Ventilator အသက်ရှူအထောက်အကူပြုစက်များကို မြန်မာဘရူဝါရီလီမိတက်နှင့် စီးပွားမိတ်ဖက် လုပ်ငန်းရှင်ကြီးများမှ ပေးအပ်လှူဒါန်းခဲ့ခြင်းဖြစ်ပြီး ပေးအပ်လှူဒါန်းပွဲအခမ်းအနားကို သြဂုတ် ၂၈ ရက်က ပဲခူးမြို့၊ ခုတင် ၅၀ဝ ဆံ့ အထွေထွေရောဂါကုပြည်သူ့ဆေးရုံကြီးအပေါ်ထပ် အစည်းအဝေးခန်းမတွင် ကျင်းပ ပြုလုပ်ခဲ့ခြင်းဖြစ်သည်။
အဆိုပါအခမ်းအနားတွင် မြန်မာဘရူဝါရီလီမိတက်နှင့် စီးပွားမိတ်ဖက်လုပ်ငန်းရှင်ကြီးများမှ ငွေကျပ် ၁၆၅ သိန်းတန်ဖိုးရှိ Ventilator အသက်ရှူအထောက်အကူပြုစက် ၁ လုံးအား ပဲခူးမြို့၊ ခုတင် ၅၀ဝ ဆံ့ အထွေထွေရောဂါကု ပြည်သူ့ဆေးရုံကြီးမှ ဒုတိယဆေးရုံအုပ်ကြီး ဒေါက်တာသူဇာအောင်နှင့် မေ့ဆေးအထူးကု ဆရာဝန်ကြီး ဒေါက်တာယုသဉ္စာနွယ်တို့ထံ ပေးအပ်လှူဒါန်းခဲ့ပြီး အဆိုပါလှူဒါန်းမှုအတွက် ဒုတိယ ဆေးရုံအုပ်ကြီးမှ ဂုဏ်ပြုမှတ်တမ်းပြန်လည်ပေးအပ်ခဲ့သည်။
မြန်မာဘရူဝါရီလီမိတက်အနေဖြင့်၂၀၂၀ ပြည့်နှစ် ဇွန် ၃ ရက်နေ့တွင်လည်း ရန်ကုန်မြို့၊ ဝေဘာဂီ အထူးကုဆေးရုံကြီး ICU အရေးပေါ်ဌာနအတွက် Patient Monitors ၂ စုံ၊ Oxygen Concentrators ၂ စုံနှင့် မြောက်ဥက္ကလာပ ဆေးရုံကြီး ICU အရေးပေါ်ဌာနအတွက် Patient Monitors ၂ စုံ၊ ဩဂုတ် ၂၀ ရက်တွင် မုံရွာပြည်သူ့ဆေးရုံကြီးတွင် Ventilator အသက်ရှူစက် ၁ လုံး၊ ဩဂုတ် ၂၁ ရက်တွင် မန္တလေးမြို့အထွေထွေရောဂါကုဆေးရုံကြီးအတွက် Ventilator အသက်ရှူစက် ၁ လုံး လှူဒါန်းပေးအပ်ခဲ့ပြီးဖြစ်သည်။ ထို့အပြင် မြန်မာနိုင်ငံရှိ ဆေးရုံများသို့လည်း Ventilator အသက်ရှူစက်များ ဆက်လက်လှူဒါန်းပေးနိုင်ရန် စီစဉ်ဆောင်ရွက်နေကြောင်း သိရသည်။
ရွှေဒုံသစ္စာ