ဧရာဝတီတိုင်းဒေသကြီး၏ ဖွံ့ဖြိုးရေးလုပ်ငန်းများအား ပိုမိုထိရောက်စွာဆောင်ရွက်ရန် စက်ယန္တရားများ ပေးအပ်လှူဒါန်း
ပုသိမ်၊ ဩဂုတ် ၂၉
ဧရာဝတီတိုင်းဒေသကြီး၏ ဖွံ့ဖြိုးရေးလုပ်ငန်းများအား ပိုမိုထိရောက်စွာဆောင်ရွက်ရန် စက်ယန္တရားများပေးအပ်လှူဒါန်းပေးခဲ့ကြောင်း ဧရာဝတီတိုင်းဒေသကြီးအစိုးရအဖွဲ့၏ ဩဂုတ် ၂၈ ရက် ထုတ်ပြန်သတင်းများ အရသိရသည်။ အဆိုပါစက်ယန္တရားများကို ဧရာဝတီတိုင်းဒေသကြီးအတွင်းရှိ ကျေးလက်ဒေသဖွံ့ဖြိုးတိုးတက် ရေးဦးစီးဌာနမှ ခရိုင်ကျေးလက်ဦးစီးမှူးရုံးများနှင့် မြို့နယ်/မြို့စည်ပင်သာယာရေးကော်မတီများအနေဖြင့် ကျေးလက်ဒေသဖွံ့ဖြိုးတိုးတက်ရေးလုပ်ငန်းများနှင့် စည်ပင်သာယာရေးလုပ်ငန်းများကို အကောင်အထည်ဖော် ဆောင်ရွက်ရာတွင် လုပ်ငန်းများပိုမိုဆောင်ရွက်နိုင်ရေးအတွက် တိုင်းဒေသကြီးအစိုးရအဖွဲ့ ဒေသဖွံ့ဖြိုးရေး ရန်ပုံငွေဖြင့် ဝယ်ယူဖြည့်တင်း လွှဲပြောင်းပေးအပ်လှူဒါန်းခဲ့ခြင်းဖြစ်ကြောင်း သိရသည်။
အဆိုပါစက်ယန္တရားများ ပေးအပ်လှူဒါန်းပွဲအခမ်းအနားကို ဩဂုတ် ၂၇ ရက်က ပုသိမ်မြို့၊ မြို့တော်ခန်းမ၌ ကျင်းပပြုလုပ်ခဲ့ခြင်းဖြစ်သည်။ အဆိုပါအခမ်းအနားတွင် မြေတူးစက် တန်(၂၀) တစ်စီး၊ မြေတူးစက် (၃ ဒသမ ၅) တန် ၉ စီး၊ မြေတူးစက် (၅ ဒသမ ၅)တန် ၃ စီး စုစုပေါင်း ၁၃ စီးလွှဲပြောင်း ပေးအပ်ခဲ့သည်။ ဧရာဝတီ တိုင်းဒေသကြီးအစိုးရအဖွဲ့အနေနှင့် တိုင်းဒေသကြီး အစိုးရအဖွဲ့ ဒေသဖွံ့ဖြိုးရေးရန်ပုံငွေဖြင့် စက်ယန္တရားများ ဝယ်ယူလှူဒါန်းမှုကို ယခုအကြိမ်ပါဆိုလျှင် မြို့နယ်/မြို့စည်ပင်သာယာရေးကော်မတီများအတွက် ၄ ကြိမ်၊ ကျေးလက်ဒေသဖွံ့ဖြိုးတိုးတက်ရေးဦးစီးဌာနအတွက် ၁ ကြိမ်၊ ဖြည့်ဆည်းပေးအပ် လှူဒါန်းပေးခဲ့ပြီး ယာဉ်အစီးရေ ၆၃ စီး၊ စက်ယန္တရား ၃၈ စီး၊ သုံးဘီးဆိုင်ကယ် ၅၆ စီး စုစုပေါင်း ၁၅၇ စီး ထောက်ပံ့လှူဒါန်းပေးခဲ့ပြီး ဖြစ်သည်။ အဆိုပါစက်ယန္တရားများကို ရန်ပုံငွေကျပ်သန်း ၅၁၇၆ သန်းကျခံလျက် တင်ဒါစနစ်ဖြင့် ဝယ်ယူထောက်ပံ့ ပေးခြင်းဖြစ်ကြောင်း သိရသည်။
ရွှေဒုံသစ္စာ
