ပေါင်မြို့နယ်နှင့် ဘားအံတွင် စိတ်ကြွရူးသွပ်ဆေးပြားများဖမ်းဆီးရမိ
ပေါင် ဩဂုတ် ၂၁
ဩဂုတ် ၁၉ ရက်၊ နံနက် ၁၀ နာရီ ၅ မိနစ်အချိန် မွန်ပြည်နယ်ရဲတပ်ဖွဲ့မှ တပ်ဖွဲ့ဝင်များသည် ပေါင်မြို့နယ်၊ မုတ္တမကျေးရွာအုပ်စု၊ ကော့စိုင်ကျေးရွာရှိ တည်းခိုခန်းအားရှာဖွေရာ မစံသီလှိုင်ထံမှ စိတ်ကြွရူးသွပ်ဆေးပြား ၃,၈၀၀ ပြား၊ လက်ကိုင်ဖုန်းတစ်လုံး၊ မြန်မာငွေ ၄၈,၀၀၀ ကျပ်တို့ကိုသိမ်းဆည်းရမိခဲ့သဖြင့် မစံသီလှိုင်(၄၁)နှစ်အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သတင်းရရှိသည်။
အလားတူ ဩဂုတ် ၁၉ ရက်၊ ည ၁၁ နာရီအချိန် ဘားအံခရိုင်ရဲတပ်ဖွဲ့မှ တပ်ဖွဲ့ဝင်များသည် ကရင်ပြည်နယ်၊ ဘားအံမြို့နယ်၊ ဘားကပ်ကျေးရွာအုပ်စု၊ ဘားကပ်ကျေးရွာအနီးတိုးဂိတ်တွင် အောင်ပု(ခ)အောင်ထွေး(ခ)ကျော်ကြီးကို တွေ့ရှိ၍ စစ်ဆေးရှာဖွေရာ ၎င်းထံမှ စိတ်ကြွရူးသွပ်ဆေးပြား ၅,၅၀၀ ပြား သိမ်းဆည်းရမိခဲ့သဖြင့် အောင်ပု(ခ)အောင်ထွေး(ခ)ကျော်ကြီး(၂၆)နှစ်အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သိရသည်။
ဆွေဦး
