လက်ရှိချန်ပီယံတင်းနစ်မယ် ဘီယန်ကာအန်ဒရီစကူး ယူအက်စ်အိုးပင်းပြိုင်ပွဲမဝင်တော့
ဩဂုတ် ၁၉
ယူအက်စ်အိုးပင်းပြိုင်ပွဲရဲ့ လက်ရှိချန်ပီယံဖြစ်သူ ကနေဒါတင်းနစ်မယ် ဘီယန်ကာအန်ဒရီစကူးက ဒီနှစ် ယူအက်စ်အိုးပင်းပြိုင်ပွဲကို ဝင်ရောက်ယှဉ်ပြိုင်မှုမလုပ်တော့ကြောင်း ဆုံးဖြတ်လိုက်ပါတယ်။
အသက် ၂၀ အရွယ်ရှိ ဘီယန်ကာအန်ဒရီစကူးဟာ ယမန်နှစ် အောက်တိုဘာကကျင်းပခဲ့တဲ့ WBA ဗိုလ်လုပွဲစဉ်များမှာ ပါဝင်ယှဉ်ပြိုင်ရင်းဒူးဒဏ်ရာရရှိခဲ့တာကြောင့် အနားယူခဲ့ရပါတယ်။ သူက အနားယူပြီး ယူအက်စ်အိုးပင်းပြိုင်ပွဲဝင်ရန် ရည်ရွယ်ထားပါတယ်။ ဒါပေမယ့် အမေရိကန်မှာ COVID-19 ရောဂါကူးစက်မှု မြင့်မားနေတာကြောင့် ယူအက်စ်အိုးပင်းကိုဝင်ရောက်ယှဉ်ပြိုင်ခြင်းမပြုရန်ဆုံးဖြတ်ခဲ့တာလို့ သိရပါတယ်။
“ဒီနှစ်မှာ နယူးယောက်ကိုပြန်မလာဖို့အတွက် ကျွန်မ ခက်ခက်ခဲခဲဆုံးဖြတ်ခဲ့ရတာဖြစ်ပါတယ်။ ကျွန်မရဲ့ ကြံ့ခိုင်မှု ပိုကောင်းလာစေဖို့အတွက် ကြိုးစားသွားမှာပါ။ ပြန်ကစားတဲ့အခါ အမြင့်ဆုံးစွမ်းဆောင်ချင်ပါတယ်”လို့ အန်ဒရီ စကူးက ပြောဆိုခဲ့ပါတယ်။
(SO)
