ကမ္ဘာပေါ်တွင် ကိုရိုနာဗိုင်းရပ်စ် ကူးစက်ခံရသူ သန်း ၂၀ ကျော် ရှိလာ

ဝါရှင်တန်   ဩဂုတ်    ၁၁

ကမ္ဘာပေါ်တွင် ကိုရိုနာဗိုင်းရပ်စ် ကူးစက်ခံရသူ သန်း ၂၀ ကျော် ရှိလာခဲ့ကြောင်း ဂျွန်ဟော့ကင်းတက္ကသိုလ်၏ ကိန်းဂဏန်းအချက်အလက်များတွင် ဖော်ပြထားသည်။ ကိုရိုနာဗိုင်းရပ်စ်ကြောင့် သေဆုံးသူမှာလည်း ၇၃၆၀၀၀ ကျော် ရှိလာခဲ့သည်။ ကမ္ဘာပေါ်တွင် ကိုရိုနာဗိုင်းရပ်စ် ကူးစက်မှုဒဏ်ကို အဆိုးရွားဆုံး ရင်ဆိုင်နေရသည့် အမေရိကန်နိုင်ငံ၌ ကူးစက်ခံရသူ ၅ သန်းရှိနေသည်။ အမေရိကန်၏နောက် ဒုတိယနေရာတွင် ရပ်တည်နေသည့် ဘရာဇီးနိုင်ငံတွင် ကူးစက်ခံရသူ ၃ သန်း၊ အိန္ဒိယနိုင်ငံတွင် ကူးစက်ခံရသူ ၂.၂ သန်း၊ ရုရှားနိုင်ငံတွင် ကူးစက်ခံရသူ ၉၀၀၀၀၀ နီးပါး ရှိနေပြီး တောင်အာဖရိကတိုက်တွင် ကူးစက်ခံရသူ ၅၆၀၀၀၀ ရှိသည်။

ပြီးခဲ့သည့်မေလမှ ဇွန်လအတွင်း ကူးစက်ခံရသူ ၅ သန်းမှ ၁၀ သန်းအထိ မြင့်တက်လာခဲ့ရာ ၃၈ ရက်ကြာမြင့်ခဲ့သော်လည်း ကူးစက်ခံရသူ ၁၀ သန်းမှ ၁၅ သန်းအထိ မြင့်တက်လာရာတွင် ၂၄ ရက်သာ ကြာမြင့်ခဲ့သည်။ ၂၀၁၉ ခုနှစ်နှောင်းပိုင်းက တရုတ်နိုင်ငံ ဝူဟန်မြို့တွင် ကိုရိုနာဗိုင်းရပ်စ် စတင်ကူးစက်ပျံ့နှံ့ခဲ့ပြီး မတ်လ ၁၁ ရက်တွင် ကမ္ဘာ့ကျန်းမာရေးအဖွဲ့ချုပ်က ကမ္ဘာလုံးဆိုင်ရာ ကပ်ရောဂါအဖြစ် ကြေညာခဲ့သည်။   

KNT