နယူးဂျာစီပြည်နယ် စောင့်ရှောက်ရေးဂေဟာတွင် ရုပ်အလောင်း ၁၇ လောင်း တွေ့ရှိ

ဝါရှင်တန် ဧပြီ ၁၇ ဂိုဒေါင်ထဲတွင် အလောင်းတစ်လောင်း ဝှက်ထားသည်ဆိုသည့် သတင်းပေးချက်အရ နယူးဂျာစီပြည်နယ်၏ အကြီးဆုံး စောင့်ရှောက်ရေးဂေဟာတစ်ခုကို ရဲတပ်ဖွဲ့က ဝင်ရောက်ရှာဖွေခဲ့ရာ ရုပ်အလောင်း ၁၇ လောင်း တွေ့ရှိခဲ့သည်။ မကြာသေးမီအချိန်အတွင်း Andover Subacute and Rehabilitation စင်တာများနှင့် ဆက်နွှယ်သူ ၆၈ ဦး သေဆုံးခဲ့ပြီး ယင်းတို့အနက် ၂၆ ဦးမှာ COVID-19 ရောဂါပိုး ရှိနေသူများဖြစ်သည်။ အမည်မသိသူတစ်ဦး၏ သတင်းပေးချက်အရ စောင့်ရှောက်ရေးဂေဟာသို့ ဝင်ရောက်ရှာဖွေခဲ့ရာ ဂိုဒေါင်ထဲတွင် ရုပ်အလောင်း မတွေ့ရသော်လည်း စောင့်ရှောက်ရေးဂေဟာ၏ ရေခဲတိုက်အတွင်း အလောင်းများ ပြည့်နှက်နေကြောင်း တွေ့ရှိခဲ့သည်။ စောင့်ရှောက်ရေးဂေဟာ၏ ရေခဲတိုက်မှာ လူလေးဦးအတွက် တည်ဆောက်ထားသော်လည်း အလောင်း ၁၇ လောင်း တွေ့ရှိခဲ့ခြင်းဖြစ်သည်။ သေဆုံးသူ ၁၇ ဦးမှာ COVID-19 ကြောင့် သေဆုံးရခြင်း ဟုတ်၊ မဟုတ် တိတိကျကျ မသိရသေးပေ။ နယူးဂျာစီပြည်နယ်တွင် COVID-19 ကူးစက်ခံရသူ ၇၁၀၀၀ ကျော်ရှိနေပြီး လူ ၃၁၀၀ သေဆုံးခဲ့သည်။ ပြီးခဲ့သည့်အားလပ်ရက်တွင် စောင့်ရှောက်ရေးဂေဟာက အာဏာပိုင်များထံမှ ရုပ်အလောင်းထည့်သည့်အိတ် ၂၅ လုံး တောင်းခံခဲ့သည်ဟု ဆိုသည်။ စောင့်ရှောက်ရေးဂေဟာ၏ အဆောက်အအုံနှစ်ခုတွင် ခုတင် ၇၀၀ နီးပါးရှိသည်။ မတ်လ ၃၁ ရက်နောက်ပိုင်း အဆောက်အအုံတစ်ခုမှ လူနာ ၆၅ ဦး သေဆုံးခဲ့သည်ဟု အမေရိကန်မီဒီယာတစ်ခုက ဖော်ပြသည်။ (KNT)