အမေရိကန်နိုင်ငံတွင် တစ်လအတွင်း အလုပ်လက်မဲ့ ခံစားခွင့်လျှောက်ထားသူ သန်း ၂၀ အထိ ရှိလာ

ဝါရှင်တန် ဧပြီ ၁၇ ကိုရိုနာဗိုင်းရပ်စ်ကြောင့် အမေရိကန်နိုင်ငံတစ်ဝန်း ပိတ်ဆို့မှုများ လုပ်ထားချိန်တွင် စီးပွားရေးလုပ်ငန်းများ ပိတ်ထားရခြင်းကြောင့် ပြီးခဲ့သည့်ရက်သတ္တပတ်က အလုပ်လက်မဲ့ ခံစားခွင့်လျှောက်ထားသည့် အမေရိကန်နိုင်ငံသား ၅ ဒသမ ၂ သန်း ရှိခဲ့သည်။ ပြီးခဲ့သည့်ရက်သတ္တလေးပတ်အတွင်း အမေရိကန်နိုင်ငံ အလုပ်သမားရေးရာဌာနသို့ အလုပ်လက်မဲ့ခံစားခွင့် လာရောက်လျှောက်ထားသူ သန်း ၂၀ ကျော် ရှိလာခဲ့ပြီဖြစ်သည်။ အဆိုပါပမာဏမှာ ပြီးခဲ့သည့်ဆယ်စုနှစ်အတွင်း အလုပ်ရှင်များ ဖန်တီးပေးခဲ့သည့် အလုပ်အကိုင်ပမာဏနှင့် တူညီနေသည်။ အ‌မေရိကန်နိုင်ငံတွင် COVID-19 ကူးစက်ခံရသူ ၆၂၉၀၀၀ ကျော်ရှိနေပြီး သေဆုံးသူ ၃၄၆၄၁ ဦး ရှိနေသည်။ ကမ္ဘာ့စီးပွားရေးအင်အားအကြီးဆုံးဖြစ်သည့် အမေရိကန်နိုင်ငံတွင် စီးပွားရေးအကျပ်အတည်း ကြုံတွေ့ နေရာ အလုပ်လက်မဲ့ဖြစ်သူ ၃ ဒသမ ၅ ရာခိုင်နှုန်းအထိ ရှိနေသည်။ အလုပ်လက်မဲ့ဖြစ်သူ ရာခိုင်နှုန်း မှာ ဆယ်ဂဏန်းအထိ ရှိလာလိမ့်မည်ဟု စီးပွားရေးပညာရှင်များက ခန့်မှန်းထားသည်။ ဧပြီလ ၁၁ ရက် အဆုံးသတ်သည့် ရက်သတ္တပတ်တွင် အလုပ်လက်မဲ့ ခံစားခွင့် လျှောက်ထားသူ ၅ ဒသမ ၂ သန်းရှိခဲ့သော်လည်း အဆိုပါပမာဏမှာ ဧပြီလ ၄ ရက်အဆုံးသတ်သည့် ရက်သတ္တပတ်နှင့် နှိုင်းယှဉ်ပါက နည်းပါးနေသည်။ ဧပြီလ ၄ ရက် အဆုံးသတ်သည့် ရက်သတ္တပတ်တွင် အလုပ်လက်မဲ့ ခံစားခွင့်လျှောက်ထားသူ ၆ ဒသမ ၆ သန်း ရှိခဲ့သည်။ (KNT)