ရန်ကုန်မြို့ပတ်ရထားလမ်းပိုင်းတွင် ရထားလမ်းကူး လူကူးခုံးကျော်တံတားငယ်များ နေရာအလိုက် တည်ဆောက်
ရန်ကုန်၊ ဇူလိုင် ၂၅
ရန်ကုန်မြို့ပတ်ရထားစီးခရီးသွားများ လုံခြုံစိတ်ချစွာ သွားလာနိုင်စေရန် မြန်မာ့မီးရထား တိုင်း(၇) မြို့ပြ အင်ဂျင်နီယာဌာန၊ ရန်ကုန်ဘူတာကြီးမှ FOB စနစ်ဖြင့် ရထားလမ်းကူး လူကူးခုံးကျော်တံတားငယ် ၃ စင်းကို တာဝန်ယူဆောင်ရွက်လျက်ရှိရာ စက်တင်ဘာလကုန်ပိုင်း အပြီးဆောင်ရွက်ရန် လျာထားကြောင်း သိရသည်။
"အဆင့်မြှင့်တင်ဆောင်ရွက်နေတဲ့ ရန်ကုန်မြို့ပတ်ရထားလမ်းပိုင်းမှာ လူကူးခုံးကျော်တံတားငယ် ၃ စင်း ကို ဒီနှစ်ဘတ်ဂျက်မှာ တည်ဆောက်နေပါတယ်။ စက်တင်ဘာလကုန်ပိုင်းလောက်တော့ အပြီးလျာထားတယ်။ အဓိက ကတော့ မြို့ပတ်ရထားလမ်းပိုင်းကို အဆင့်မြှင့်တင်ပြီးတဲ့အခါမှာ ရထားလမ်းမိုင်ဟာ ယခင်ထက် မြန်ပြီး မောင်းမယ်။ ရထားတွေဟာလည်း ယခုထက်ပိုပြီး အဆင့်မြင့်တဲ့ရထားတွေဖြစ်လာမယ်။ ဒီအတွက်ရထားစီးခရီးသွားတွေဟာ ထွက်ချိန်မြန်ပြီး စီးလို့လည်း ပိုမိုကောင်းမွန်လာမယ့် ရထားတွေကို စီးနိုင်တော့မှာ ပေါ့။ ဒါ့အပြင် နောက်ရောက်လာမယ့်ရထားတွေရဲ့အမြင့်နဲ့အညီ ဘူတာတွေမှာ ပလက်ဖောင်းကြီးတွေကို အဆင့်မြှင့်လိုက်တဲ့အတွက် ပလက်ဖောင်းတွေမြင့်သွားတယ်။ ရထားလမ်းရဲ့ ဟိုဘက်ခြမ်း ဒီဘက်ခြမ်း လျှောက်လမ်းတွေက အမြင့်ကြီးတွေဖြစ်လာတယ်။ ဒီတော့ ပလက်ဖောင်းကနေဆင်းပြီး ဟိုဘက်ခြမ်း ဒီဘက်ခြမ်းကို ကူးဖို့ ရထားလမ်းကျော်မယ်ဆိုရင် ရုတ်တရက်သွားလာဖို့က ခရီးသွားတွေအနေနဲ့ အတော်ကို အသက်အန္တရာယ်များပါတယ်။ ဒီအတွက် ရထားလမ်းကူး လူကူးခုံးကျော်တံတားတွေကို အသစ်တည်ဆောက်ရတာပါ။ အဓိက ကတော့ လူတွေရဲ့ အသက်အန္တရာယ်ကို လုံခြုံဖို့အတွက် ပြည်သူတွေ လုံခြုံစိတ်ချစွာ တံတားပေါ်ကနေ ကူးနိုင်ဖို့ ဆောင်ရွက်တာပါ"ဟု မြန်မာ့မီးရထား(မြို့ပြ) အင်ဂျင်နီယာဌာန တံတားပေါင်အလုပ်ရုံ (မလွှကုန်း) အင်ဂျင်နီယာမှူး ဦးမောင်ချိုက ပြောသည်။
ထို ရန်ကုန်မြို့ပတ်ရထားလမ်းပေါ်ရှိ ရထားလမ်းကူးလူကူးခုံးကျော်တံတားငယ်များကို မြန်မာ့မီးရထား တိုင်း(၇) မြို့ပြအင်ဂျင်နီယာဌာန ရန်ကုန်ဘူတာကြီးမှ FOB စနစ်ဖြင့် တာဝန်ယူတည်ဆောက်ခြင်းဖြစ်သည်။ ယခုနှစ်ဘတ်ဂျက်တွင်လည်း အသစ်ထပ်မံတည်ဆောက်နေသော ရထားလမ်းကူး လူကူးခုံးကျော်တံတားငယ်သည် လှည်းတန်းနှင့် ကမာရွတ်အကြားတွင် တစ်စင်း၊ ကြက်ဘဲဈေးအနီး မလွှကုန်းနှင့် မေတ္တာညွန့်အကြားတွင်တစ်စင်း၊ အလုံဘူတာအထွက်အနီးတွင် တစ်စင်း အပါအဝင် ၃ စင်းဖြစ်ကြောင်း သိရသည်။ ထိုလူကူးခုံးကျော် တံတားငယ်ကို ယခုနှစ် ၂၀၂၀ ပြည့်နှစ် စက်တင်ဘာလကုန်ပိုင်း အပြီးတည်ဆောက်သွားရန် အရှိန်အဟုန်မြှင့် ဆောင်ရွက်နေကြောင်း သိရသည်။
ထို့ပြင် ရထားဘူတာများတွင် အသစ်ထပ်မံရောက်ရှိလာမည့် မြို့ပတ်ရထားများ၏ အမြင့်အတိုင်း ရထားပေါ်မှ ဆင်းလိုက်သည်နှင့် ဘူတာပလက်ဖောင်းသိူ့ ပြေပြစ်စွာဆင်းနိုင်ရန် ယခင်ထက် ပလက်ဖောင်း များမြှင့်ကာ အသစ်တည်ဆောက်နေကြောင်း သိရသည်။
ပြီးခဲ့သည့် ဘဏ္ဍာရေးနှစ်ဘက်ဂျက်တွင် ရန်ကုန်မြို့၏ မြို့ပတ်ရထားလမ်းကို ကျော်ဖြတ်ပြီး လူကူးခုံး ကျော် တံတားငယ် ၅ စင်း တည်ဆောက်နိုင်ခဲ့ပြီးဖြစ်သည်။ ထိုအသစ်တည်ဆောက်ပြီးစီးသွားသော ရထား လမ်းကူး လူကူးခုံးကျော်တံတားငယ်များသည် လှည်းတန်းနှင့် ကမာရွတ်ကြားတွင် တစ်စင်း၊ အင်းစိန်နှင့် ရွာမ အကြားတွင် တစ်စင်း၊ ရွာမနှင့် ဖော့ကန်အကြား တစ်စင်း၊ မင်္ဂလာဒုံဘူတာတည့်တည့်တွင် တစ်စင်း၊ မလွှကုန်း ဘူတာအထွက် ရန်ကုန်ဘက်အခြမ်းတွင် တစ်စင်းရှိကြောင်း သိရသည်။
ယခုအခါ ရန်ကုန်မြို့ပတ်ရထားလမ်းပေါ်တွင် လူကူးခုံးကျော်တံတားငယ်ပေါင်း အစင်း ၃၀ ခန့်ရှိကြောင်း သိရသည်။
ထို့ပြင် ကားလမ်းကူး Level Crossing များကိုလည်း ရန်ကုန်မြို့ ပတ်ဘူတာအဆင့်မြှင့်တင်ရေး စီမံကိန်း မှ တာဝန်ယူဆောင်ရွက်နေကြောင်း သိရသည်။
(မင်းခ)
