မန္တလေး ကျောက်ဝိုင်းအား COVID-19 ကာကွယ်ရေး စည်းကမ်းများနှင့်ကိုက်ညီမှသာ ပြန်လည်ဖွင့်လှစ်ခွင့်ပြုမည်

မန္တလေး  ဇူလိုင်  ၂၀

မန္တလေးကျောက်ဝိုင်းကို COVID-19 ရောဂါကာကွယ်ရေး စည်းကမ်းချက်များနှင့်ကိုက်ညီမှသာ ပြန်လည် ဖွင့်လှစ်ခွင့်ပြုမည်ဖြစ်ကြောင်း မန္တလေးတိုင်းဒေသကြီးအစိုးရအဖွဲ့မှ ကြေညာချက်ထုတ်ပြန်ထားသည်။

အဆိုပါ ညွှန်ကြားချက်တွင်  COVID-19 ရောဂါကြိုတင်ကာကွယ် ထိန်းချုပ်ရေးဆိုင်ရာညွှန်ကြားချက်များ အား COVID-19  ထိန်းချုပ်ရေးနှင့် အရေးပေါ်တုံ့ပြန်ရေးကော်မတီများသို့တင်ပြ၍ စစ်ဆေးမှုခံယူစေပြီး စံနှုန်းများနှင့်ကိုက်ညီမှုရှိပါက စကိတ်ကွင်း၊ ဖူဆယ်ကွင်း၊ ဘောလုံးကွင်း၊ ကိုယ်ကာယကြံ့ခိုင်မှုဝန်ဆောင်မှုလုပ်ငန်း၊ ဘိလိယက်၊ စနူကာလုပ်ငန်း၊ Spa အလှပြင်ဆိုင်၊ အကြောပြင်လုပ်ငန်းနှင့် ကျောက်ဝိုင်းကို ပြန်လည်ဖွင့်လှစ်ခွင့်ပြုမည်ဖြစ်ကြောင်း ကြေညာထားသည် ။

" ပြန်ဖွင့်ဖို့အတွက် တိုင်းအစိုးရနဲ့ တွေ့ဆုံဆွေးနွေးဖို့ အကြောင်းကြားထားတာရှိတယ်။ သတ်မှတ်ထားတဲ့ စည်းကမ်းချက်တွေနဲ့အညီ ကြိုတင်ပြင်ဆင်မှုတွေလုပ်ထားပြီးပြီ"ဟု ကျောက်ဝိုင်းအကျိုးတော်ဆောင်ကော်မတီ အတွင်းရေးမှူး ဦးမျိုးမြင့်နိုင်က ပြောသည်။

မန္တလေးမြို့တွင် COVID-19 ရောဂါ ထိန်းချုပ်ကာကွယ်နိုင်ရန် ကျောက်ဝိုင်းကို ပြီးခဲ့သည့် မတ်လ နောက်ဆုံး ပတ်ကစတင်ကာ ရက်အကန့်အသတ်မရှိ ယာယီပိတ်ထားခဲ့သည်။

မန္တလေးမြို့၊ မဟာအောင်မြေ မြို့နယ်၊ ၈၈ လမ်း၊ ၈၉ လမ်း၊ ၃၉ လမ်း နှင့် လမ်း ၄၀ ကြားရှိ မဟာအောင်မြေ ကျောက်မျက်ရတနာရောင်းဝယ်ရေးစခန်း(ကျောက်ဝိုင်း)သည် မြန်မာနိုင်ငံတွင် အကြီးဆုံးကျောက်မျက်ရတနာ စျေးတစ်ခုဖြစ်ပြီး နေ့စဉ်ဝင်ထွက်အရောင်းအဝယ်ပြုလုပ်သူ ငါးသောင်းကျော်ရှိသည်။

မေဘယ်လ်အောင်