ကျောင်းများပြန်လည်ဖွင့်လှစ်ချိန်တွင် COVID-19 ​ရောဂါ ကာကွယ်တားဆီး​ရေး စီစဉ်ဆောင်ရွက်မှု အ​ခြေအ​နေများအား ကွင်းဆင်းစစ်​ဆေး

လေးမျက်နှာ  ဇူလိုင်  ၂၀

ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ်အတွင်းရှိ အ​ခြေခံပညာအထက်တန်း​ကျောင်း(၈)ကျောင်းနှင့် အထက်တန်း​ကျောင်းခွဲ (၁၂)​ ကျောင်းတို့ ပြန်လည်ဖွင့်လှစ်ချိန်တွင် COVID-19 ရောဂါ ကာကွယ်တားဆီး​ရေး စီစဉ်ဆောင်ရွက်ထားမှုအ​ခြေအ​နေများအား ဇူလိုင် ၁၈ ရက်မှ ၂၀ ရက်အထိ အ​ထွေ​ထွေအုပ်ချုပ်​ရေးဦးစီးဌာန၊ ပြည်သူ့ကျန်းမာ​ရေးဦးစီးဌာန၊ မြို့နယ်ပညာ​ရေးမှူးရုံးတို့မှ တာဝန်ရှိသူများ၊ မိဘ ဆရာအသင်းမှကျောင်း၏ ကိုယ်စားလှယ်တို့ကအဖွဲ့သုံးဖွဲ့ခွဲ၍ ကွင်းဆင်းစစ်​ဆေးခဲ့သည်။

လေးမျက်နှာမြို့နယ်အတွင်းရှိ အ-ထ-ကကျောင်းနှင့် အ-ထ-က(ခွဲ) ကျောင်းတို့၌ ကျန်းမာရေးနှင့် အားကစားဝန်ကြီးဌာန၊ ပညာရေးဝန်ကြီးဌာနတို့ ပူးပေါင်းရေးဆွဲထားသည့် ဆန်းစစ်မှုပုံစံ (Checklist)မှာပါဝင်သော အချက်ပေါင်း(၈၈)အား ဆန်းစစ်ကာ ပြည့်စုံမှု ရှိ/မရှိကို A,B,C အဆင့် ၃ ဆင့်ခွဲခြား သတ်မှတ်ထားပြီး A အဆင့်နှင့် ကိုက်ညီသည့် ကျောင်းများအား ဖွင့်လှစ်စေပြီး  B  နှင့်  C ရရှိသော ကျောင်းများက လိုအပ်ချက်များကို နှစ်ရက်အတွင်း ဖြည့်ဆည်းဆောင်ရွက်ကြရမည်ဖြစ်ကြောင်း၊ ကျောင်းဖွင့်ချိန်တွင် ကျောင်းသား၊ ကျောင်းသူ နှင့် မိဘများကျောင်းသို့မလာမီနှင့် လာရောက်စဉ်တွင် လိုက်နာရမည့် စည်းကမ်းချက်များ၊ ကျောင်းချိန်အတွင်း ဆရာ၊ ဆရာမများနှင့်ကျောင်းသား၊ ကျောင်းသူများ လိုက်နာရမည့်အချက်များကို ကြေညာပေးထားကြောင်း သိရှိရသည်။

ဝေဝေ(လေးမျက်နှာ)