ကမ္ဘာ့ကြက်တောင်အဖွဲ့ချုပ် (BWF)က နိုင်ငံတကာကြက်တောင်ပြိုင်ပွဲနှစ်ခု ဖျက်သိမ်း

ဇူလိုင်   ၁၉

ကမ္ဘာ့ကြက်တောင်အဖွဲ့ချုပ်က    မြန်မာနိုင်ငံအိမ်ရှင်အဖြစ်လက်ခံကျင်းပမည့် နိုင်ငံတကာကြက်တောင် ပြိုင်ပွဲနှစ်ခုအပါအဝင် ပြိုင်ပွဲတစ်ချို့ရဲ့ ကျင်းပမည့်အစီအစဉ်ကိုဖျက်သိမ်းလိုက်ပါတယ်။ ကမ္ဘာ့ကြက်တောင် အဖွဲ့ချုပ်ဟာ စက်တင်ဘာ ၂၉ ရက်မှ အောက်တိုဘာ ၄ ရက်အထိပြုလုပ်မည့် International Challenge ပြိုင်ပွဲနှင့် အောက်တိုဘာလ ၆ ရက်မှ ၁၁ ရက်အထိကျင်းပမည့် Future Series ပြိုင်ပွဲတို့ကို မြန်မာနိုင်ငံ၌ ကျင်းပရန်စီစဉ်ခဲ့သော်လည်း လက်ရှိတွင် Covid-19 ရောဂါကာကွယ်ထိန်းချုပ်ရေးကာလဖြစ်သောကြောင့် ကမ္ဘာ့ကြက်တောင်အဖွဲ့ချုပ်သည် မြန်မာနိုင်ငံမှာကျင်းပမယ့် ပြိုင်ပွဲနှစ်ခုအပါအဝင် Grade-3 အဆင့်ရှိပြိုင်ပွဲ များအားလုံးကို ဖျက်သိမ်းခဲ့ပါတယ်။

ကမ္ဘာ့ကြက်တောင်အဖွဲ့ချုပ်ဟာ ယခုနှစ်နိုင်ငံတကာပြိုင်ပွဲတွေကို မတ်လမှစကာရပ်နားခဲ့ပြီး ရွှေ့ဆိုင်း ထားခဲ့တဲ့ Grade-2 နိုင်ငံတကာကြက်တောင်ပြိုင်ပွဲတစ်ချို့ကိုတော့ ဩဂုတ်လမှာပြန်လည်ကျင်းပပေးမယ်လို့ သိရပါတယ်။  Grade-2 အဆင့်ပြိုင်ပွဲ ၂၀ ကျော်ကို ပြန်လည်ကျင်းပဖို့စီစဉ်ထားပေမယ့် အဲဒီပြိုင်ပွဲများရဲ့ ရလဒ်တွေကိုတော့ အိုလံပစ်ဝင်ခွင့်အတွက် ထည့်သွင်းမတွက်ချက်ဘူးလို့သိရပါတယ်။ တိုကျိုအိုလံပစ် ပြိုင်ပွဲရဲ့ လက်ရည်စစ်ပွဲကာလကို ၂၀၂၁ ခုနှစ်၊ ဇန်နဝါရီလ ၄ ရက်မှ မေ ၂ ရက်အထိ သတ်မှတ်ထားကြောင်း သိရပါတယ်။
                                                                                                                                (SO)