Workday Charity Open ဂေါက်သီးရိုက်ပြိုင်ပွဲတွင် အမေရိကန်ကစားသမား ကိုလ်လင်း ချန်ပီယံဆု ဆွတ်ခူး
ဇူလိုင် ၁၄
အမေရိကန်နိုင်ငံ၌ကျင်းပခဲ့သည့် Workday Charity Open ဂေါက်သီးရိုက်ပြိုင်ပွဲတွင် အမေရိကန် ဂေါက်သီးရိုက်ကစားသမား ကိုလ်လင်းက ချန်ပီယံဆုဆွတ်ခူးရရှိခဲ့ကြောင်း သိရသည်။ အသက် ၂၃ နှစ်အရွယ်ရှိ ကိုလ်လင်းသည် အဆိုပါပြိုင်ပွဲ၏ ချန်ပီယံဆုကို ပြတ်သားသည့်ရလဒ်ဖြင့် ဆွတ်ခူးနိုင်ခဲ့ခြင်းမဟုတ်ဘဲ Play-Off အဆင့်ထိကစားကာ ဆွတ်ခူးနိုင်ခဲ့ခြင်းဖြစ်သည်။
ယင်းပြိုင်ပွဲ နောက်ဆုံးနေ့ပွဲစဉ်များအပြီးတွင် ကိုလ်လင်းသည် သတ်မှတ်ရိုက်ချက်ထက် ၁၉ ချက် လျှော့ရိုက်ကာ အမှတ်ပေးဇယားကိုဦးဆောင်နိုင်ခဲ့သော်လည်း တတိယနေ့တွင် အမှတ်ပေးဇယားကို ဦးဆောင်နိုင်ခဲ့သည့် ဂျက်စတင်သောမတ်စ်နှင့်ရိုက်ချက်တူခဲ့သောကြောင့် ချန်ပီယံဆုအတွက် ယင်းတို့နှစ်ဦး Play-Off ကစားခဲ့ရာ ကိုလ်လင်းကအနိုင်ရရှိပြီး ချန်ပီယံဆုဆွတ်ခူးနိုင်ခဲ့ခြင်းဖြစ်သည်။
ဂျက်စတင်သောမတ်စ်သည် Play-Off အဆင့်တွင် ထင်မှတ်မထားသည့်အမှားများ ကျူးလွန်ခဲ့သည့် အတွက် ချန်ပီယံဆုနှင့်လွဲချော်ခဲ့ရကာ ကမ္ဘာ့အဆင့် (၁) နေရာကို စိန်ခေါ်နိုင်မည့်အခွင့်အရေးလည်းလွဲချော်ခဲ့သည်။
ကိုလ်လင်းသည် အဆိုပါ ချန်ပီယံဆုဆွတ်ခူးနိုင်ခဲ့ပြီးနောက် ကမ္ဘာ့အဆင့် (၁၃) နေရာသို့ တက်ရောက်နိုင်ခဲ့ သည်။
(သူရိန်)
