ယူကရိန်းလက်ဝှေ့သမား လိုမာချန်ကိုနှင့် အမေရိကန်လက်ဝှေ့သမား လိုပက်ဇ်တို့၏ ပွဲစဉ်ကို ထပ်မံရွှေ့ဆိုင်း

ဇူလိုင်    ၁၀

WBA (Super)၊ WBO တို့၏ လိုက်ဝိတ်တန်းချန်ပီယံ၊ WBC လိုက်ဝိတ်တန်းယာယီချန်ပီယံ လိုမာချန်ကိုနှင့် IBF လိုက်ဝိတ်တန်းချန်ပီယံ လိုပက်ဇ်တို့၏ပွဲစဉ်ကို လာမည့် အောက်တိုဘာ ၃ ရက်သို့ ထပ်မံရွှေ့ဆိုင်းခဲ့ကြောင်း သိရသည်။

ယူကရိန်းလက်ဝှေ့သမား လိုမာချန်ကိုနှင့် အမေရိကန်လက်ဝှေ့သမား လိုပက်ဇ်တို့၏ စိန်ခေါ်ပွဲကို ပြီးခဲ့သည့် မေ ၃၀ ရက်က ထိုးသတ်သွားရန်စီစဉ်ခဲ့သော်လည်း COVID-19 ကမ္ဘာ့ကပ်ရောဂါကြောင့် လာမည့် စက်တင်ဘာ ၁၉ ရက်သို့ ရွှေ့ဆိုင်းခဲ့သည်။ သို့သော် အခက်အခဲများရှိနေသောကြောင့် အဆိုပါပွဲစဉ်ကို အောက်တိုဘာ ၃ ရက်သို့ ထပ်မံရွှေ့ဆိုင်းခဲ့ခြင်းဖြစ်သည်။

“လိုမာချန်ကိုနဲ့ လိုပက်ဇ်တို့ရဲ့ ပွဲစဉ်ကို လာမယ့်စက်တင်ဘာ ၁၉ ရက်မှာ ကျင်းပသွားဖို့ စီစဉ်ခဲ့ပါတယ်၊ အဲဒီပွဲစဉ်ကို ထုတ်လွှင့်ဖို့အတွက် ရုပ်သံတွေနဲ့ ညှိနှိုင်းတဲ့နေရာမှာ အချိန်ကာလအခက်အခဲတွေ ရှိနေတဲ့ အတွက် အောက်တိုဘာ ၃ ရက်ကို ရွှေ့ဆိုင်းဖို့ဆုံးဖြတ်ခဲ့ပါတယ်၊ အဲဒီပွဲစဉ်မှာ ပရိသတ်တွေကိုလည်း ဝင်ရောက်ကြည့်ရှုနိုင်အောင် စီစဉ်ထားပါတယ်၊ ဒါပေမဲ့ ပရိသတ်တွေကို အကန့်အသတ်နဲ့ ဝင်ခွင့်ပြုမှာပါ၊ ပရိသတ်အယောက် ၂၀၀၀ နဲ့ ၂၅၀၀ ကြား ဝင်ခွင့်ပြုနိုင်အောင် စီစဉ်ထားပါတယ်” ပွဲစီစဉ်သူတစ်ဦးက ပြောကြားခဲ့သည်။                                                                                                                          

(သူရိန်)