ရန်ကုန် ဧပြီ ၈ COVID-19 ကူးစက်ရောဂါ ကြိုတင်ကာကွယ်တားဆီး ထိန်းချုပ်ကုသရေးလုပ်ငန်းများအတွက် တရုတ် နိုင်ငံမှ ပေးပို့လှူဒါန်းသည့် ဆေးအသုံးအဆောင်ပစ္စည်းများ တင်ဆောင်လာသောလေယာဉ်သည် ဧပြီ ၈ ရက်၊ နံနက်ပိုင်းတွင် ရန်ကုန်မြို့သို့ရောက်ရှိခဲ့ကြောင်း သတင်းရရှိသည်။ ယခုကဲ့သို့ပေးပို့လှူဒါန်းသည့် ဆေးပစ္စည်းများကို တင်ဆောင်လာသော တရုတ်လေကြောင်းလိုင်းမှ လေယာဉ်သည် ကူမင်းလေဆိပ်မှထွက်ခွာခဲ့ပြီး ဧပြီ ၈ ရက်၊ နံနက် ၁၀ နာရီခွဲအချိန်တွင် ရန်ကုန်အပြည်ပြည်ဆိုင်ရာလေဆိပ်သို့ ဆိုက်ရောက်ခဲ့ခြင်းဖြစ်သည်။ အဆိုပါလေယာဉ်ဖြင့် တရုတ်နိုင်ငံ၊ ယူနန်ပြည်နယ်မှ အဖွဲ့ဝင် ၁၂ ဦးပါဝင်သော ဆေးဘက်ဆိုင်ရာ ကျွမ်းကျင်ပညာရှင်အဖွဲ့နှင့်အတူ Disposable Coverall, Medical Protective Face Mask & Medical Face Mask စသည့် ဆေးပစ္စည်းများကို သယ်ဆောင်ခဲ့ခြင်းဖြစ်သည်။ မြန်မာနိုင်ငံ၏ COVID-19 အသက်ရှူလမ်းကြောင်းဆိုင်ရာ ကူးစက်ရောဂါပြန့်ပွားမှုများ တိုက်ဖျက်ရာတွင် အထောက်အကူဖြစ်စေရန်အတွက်ရည်ရွယ်၍ ယူနန်ပြည်နယ် ဆေးဘက်ဆိုင်ရာကျွမ်းကျင်ပညာရှင်အဖွဲ့နှင့် ဆေးပစ္စည်းများကို စေလွှတ်ပေးပို့ခဲ့ခြင်းဖြစ်သည်။ ထိုသို့ပေးပို့လှူဒါန်းခဲ့သည့် ဆေးပစ္စည်းများကို ရန်ကုန်အပြည်ပြည်ဆိုင်ရာလေဆိပ်၊ ပြည်ပ VIP ခန်းမ (၂) တွင် မြန်မာနိုင်ငံဆိုင်ရာ တရုတ်သံအမတ်ကြီး H.E.Mr.Chen Hai နှင့်အဖွဲ့က ကျန်းမာရေးနှင့် အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေးထံသို့ လွှဲပြောင်းပေးခဲ့ကြောင်း သိရသည်။ ကျော်စိုးသူ (City News)