ပုပ္ပါးတောင်တွင် ဘူမိနယ်မြေသစ်များ ထပ်မံဖော်ထုတ်မည်
ရန်ကုန်၊ ဇွန် ၃
ပုပ္ပားတောင် အမျိုးသားဘူမိဥယျာဉ်ကို ကမ္ဘာ့ဘူမိဥယျာဉ်အဖြစ် သတ်မှတ်ရန် မတူညီသည့် ဘူမိနယ်မြေအသစ်များ ဆက်လက် ဖော်ထုတ်သွားမည်ဖြစ်ကြောင်း သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနက သိရသည်။
မြန်မာနိုင်ငံတွင် ကမ္ဘာ့ဘူမိဥယျာဉ်အဖြစ် သတ်မှတ်ခံရရန် အလားအလာကောင်းများရှိသည့် နေရာများတွင် ပုပ္ပားတောင် ဒေသသည် တစ်ခုအပါအဝင်ဖြစ်ပြီး ၂၀၂၃ ခုနှစ်၊ ဒီဇင်ဘာ ၆ ရက်က ဘူမိနယ်မြေ ၁၅ ခုဖြင့် ဖွဲ့စည်းထားသော မြန်မာနိုင်ငံ၏ ပထမဆုံးသော အမျိုးသားအဆင့်ဘူမိဥယျာဉ်အဖြစ် သတ်မှတ် ကြေညာထားပြီးဖြစ်သည်။
လက်ရှိတွင် ကမ္ဘာ့ဘူမိဥယျာဉ်အဖြစ် သတ်မှတ်ခံရရေးအတွက် UNESCO သို့ စာရင်းတင်သွင်းရာ၌ သဘောသဘာဝမတူညီသည့် ဘူမိနယ်မြေသစ်များကို ထပ်မံဖော်ထုတ်မည်ဖြစ်ပြီး ကြိုတင် ပြင်ဆင်ရေးလုပ်ငန်းများကို ၂၀၂၄- ၂၀၂၅ ဘဏ္ဍာနှစ် ပြည်ထောင် စုငွေလုံးငွေရင်းမှ ရန်ပုံငွေခွင့်ပြုချက်ဖြင့် ဆောင်ရွက်နေကြောင်း သိရသည်။
UNESCO ၏ ကမ္ဘာ့ဘူမိဥယျာဉ် အစီအစဉ်ကို ၂ဝဝ၁ ခုနှစ်တွင် စတင်ခဲ့ပြီး တရုတ်နိုင်ငံတွင် ကမ္ဘာ့ဘူမိဥယျာဉ် (၃၉)ခု ရှိပြီး ထိုင်း၊ အင်ဒိုနီးရှား၊ ဗီယက်နမ်နှင့် မလေးရှားနိုင်ငံတို့တွင်လည်း ကမ္ဘာ့ဘူမိဥယျာဉ်များရှိကြောင်း သိရသည်။
(008)
