ဖားကန့် ဇူလိုင် ၂
ကချင်ပြည်နယ်၊ မိုးညှင်းခရိုင်၊ ဖားကန့်မြို့နယ်၊ ဆိပ်မူကျေးရွာအုပ်စု၊ ဝှေခါကျေးရွာ၊ လခူးချောင်ရပ်ကွက်ရှိ တစ်သုံးလုံး၊ ရတနာကြယ်၊ ကျောက်မျက်ရွှေကြည်၊ ရတနာဆန်းရွှင်၊ ဧရာရတနာစုပေါင်းလုပ်ကွက်ဟောင်း နေရာများတွင် ဇူလိုင် ၂ ရက်၊ နံနက် ၈ နာရီအချိန်က ရေမဆေးသမားများ ရေမဆေးကျောက် ဝင်ရောက်တူးဖော်နေစဉ် မိုးရွာသွန်းမှုကြောင့် မြေပြိုကျမှုဖြစ်ပွားရာ နွံလှိုင်းရိုက်ခတ်မှုဖြစ်ပွားပြီး ရေမဆေး ကျောက်ရှာဖွေသူများ နွံနစ်မှုဖြစ်ပွားခဲ့ကြောင်း သိရသည်။
အဆိုပါ မြေပြိုမှုဖြစ်ပွားရာနေရာသို့ ဖားကန့်မြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်များ၊ အရန်မီးသတ် တပ်ဖွဲ့ဝင်များမှ သက်ဆိုင်ရာအဖွဲ့အစည်းများနှင့်ပူးပေါင်း၍ ရှာဖွေကယ်ဆယ်ရေးလုပ်ငန်းများ ဆောင်ရွက် လျက်ရှိရာ နံနက် ၉ နာရီခွဲအချိန်တွင် သေဆုံးသူများ၏ ရုပ်အလောင်း ၃၅ လောင်း၊ နံနက် ၁၀ နာရီအချိန်တွင် ရုပ်အလောင်း ၁၅ လောင်း၊ နံနက် ၁၁ နာရီ ၁၀ မိနစ်အချိန်တွင် ရုပ်အလောင်း ၃၇ လောင်း၊ မွန်းတည့် ၁၂ နာရီ အချိန်တွင် ရုပ်အလောင်း ၂၆ လောင်း၊ ညနေ ၃ နာရီ ၃၅ မိနစ်အချိန်တွင် ရုပ်အလောင်း ၁၃ လောင်းတို့အား ရှာဖွေတွေ့ရှိခဲ့သည်။
လက်ရှိအခြေအနေတွင် ကယ်ဆယ်ရှာဖွေရေးလုပ်ငန်းများအား မြေပြိုမှုအန္တရာယ်စိုးရိမ်ရသဖြင့် ခေတ္တရပ်ဆိုင်း ထားရသည်။
အဆိုပါ မြေပြိုမှုဖြစ်စဉ်ကြောင့် လက်ရှိအချိန်အထိ သေဆုံးသူဦးရေ ၁၂၆ ဦးအထိ ရှိလာပြီဖြစ်ကြောင်း မြန်မာနိုင်ငံမီးသတ်တပ်ဖွဲ့၏ ထုတ်ပြန်ချက်အရ သိရသည်။
(သူရိန်)