ရန်ကုန်တိုင်းဒေသကြီးရဲတပ်ဖွဲ့နယ်မြေအတွင်း လက်နက်ကိုင်ဆောင်သူများ ဖမ်းဆီးအရေးယူ
ရန်ကုန် ဇွန် ၂၈
ရန်ကုန်တိုင်းဒေသကြီးရဲတပ်ဖွဲ့နယ်မြေအတွင်း တရားဥပဒေစိုးမိုးရေးနှင့် ပြည်သူ လူထု၏ အသက်အိုးအိမ် စည်းစိမ်ကိုထိခိုက်စေမည့် မှုခင်းများမဖြစ်ပွားစေရေး အတွက် သက်ဆိုင်ရာ နယ်မြေအလိုက် ဖမ်းဆီးခြင်းဆောင်ရွက်ခဲ့ရာ ဇွန် ၂၇ ရက်၊ နေ့လယ် ၃ နာရီ ၅၀ မိနစ်အချိန်တွင် (၁၁)ရပ်ကွက်၊ ပဲခူးလမ်းမပေါ်၌ သက်ပိုင်ဦးထံမှ အရိုးအသွား (၁၁)လက်မခွဲခန့်ရှိ ထိပ်ဦးချွန်ဓားတစ်ချောင်း၊ ည ၈ နာရီ ၁၀ မိနစ်အချိန်တွင် (၁၉) ရပ်ကွက်၊ ဓညဝတီလမ်းမ ပေါ်၌ ဝမ်းကိုထံမှ အရိုးအသွား(၉)လက်မခန့်ရှိ ထိပ်ဦးချွန်ဓားတစ်ချောင်းနှင့် ည ၈ နာရီ ၄၀ မိနစ်အချိန်တွင် အလယ်ကျေးရွာ၊ အနော်ရထာလမ်းမပေါ်၌ စောလင်းကိုကိုထံမှ အရိုအသွား(၁၁)လက်မခန့်ရှိ စကေဘာတစ်ချောင်းကိုလည်းကောင်း၊
မြောက်ဥက္ကလာပမြို့နယ်ရဲတပ်ဖွဲ့မှတပ်ဖွဲ့ဝင်များသည် ဇွန် ၂၇ ရက်၊ မွန်းလွဲ ၂ နာရီ ၂၀ မိနစ်အချိန်တွင် ညောင်ရမ်းလမ်းမပေါ်၌ မင်းမင်းအောင်ထံမှ အရိုးအသွား(၃၂)လက်မခန့်ရှိ ငှက်ကြီးတောင်ဓားတစ်ချောင်းကိုလည်းကောင်း၊ ဒဂုံမြို့သစ်(တောင်ပိုင်း)မြို့နယ်ရဲတပ်ဖွဲ့မှတပ်ဖွဲ့ဝင်များသည် ည ၇ နာရီခွဲအချိန်တွင် (၇၁)ရပ်ကွက်၊ ဘုရင့်နောင်လမ်းမပေါ်၌ ဓားကိုင်သောင်းကျန်းနေသော မောင်မောင်ထံမှ အရိုးအသွား(၂၅)လက်မ ခန့်ရှိ ငှက်ကြီးတောင်ဓါတစ်ချောင်းကိုလည်းကောင်း၊
ကြည့်မြင်တိုင်မြို့နယ်ရဲတပ်ဖွဲ့မှတပ်ဖွဲ့ဝင်များသည် ည ၁၀ နာရီ ၁၀ မိနစ်အချိန်တွင် ဘလုတ်ညွန့်ရပ်ကွက်၊ ခတ္တာလမ်းမပေါ်၌ အောင်ဇော်ထွန်းထံမှ အရိုးအသွား(၁၀)လက်မခန့်ရှိ ထိပ်ဦးချွန်ဓားတစ်ချောင်းကို လည်းကောင်း သိမ်းဆည်းရရှိ၍ သက်ဆိုင်ရာရဲစခန်းအသီးသီးတွင် လက်နက်အက်ဥပဒေပုဒ်မ ၁၉(င)အရ အမှုဖွင့်အရေးယူခဲ့ကြောင်း သိရသည်။
ဆွေဦး
