ဇွဲကပင်တောင်တွင် ပျောက်ဆုံးခဲ့သည့် ကျောင်းသူ အလောင်းအား တွေ့ရှိ၊ ပြန်လည်သယ်ယူရေးဆောင်ရွက်

ဘားအံ၊ ဇွန် ၂၇

ကရင်ပြည်နယ်၊ ဘားအံမြို့နယ်ရှိ ဇွဲကပင်တောင်တွင် ပျောက်ဆုံးခဲ့သည့် တက္ကသိုလ်ကျောင်းသူ၏ ရုပ်အလောင်းကို ဇွန် ၂၇ ရက်၊ နံနက် ၁၀ နာရီ ၃ မိနစ်အချိန်တွင် ဒရုန်းဖြင့် ရှာဖွေတွေ့ရှိခဲ့ပြီးနောက် ပြန်လည်သယ်ယူရေးလုပ်ငန်းများ ဆောင်ရွက်လျက်ရှိကြောင်း မြန်မာနိုင်ငံမီးသတ်တပ်ဖွဲ့၏ သတင်းထုတ်ပြန် ချက်အရ သိရသည်။

ဇွန် ၂၆ ရက်၊ နံနက် ၅ နာရီ ၇ မိနစ်အချိန်ခန့်က ဇွဲကပင်တောင်ပေါ်တွင် အမျိုးသမီးတစ်ဦးပျောက်ဆုံးနေ ကြောင်း သတင်းရရှိသဖြင့် ဘားအံမြို့နယ်မီးသတ်စခန်းမှ အုပ်ချုပ်မှုယာဉ်တစ်စီး၊ ရှာဖွေကယ်ဆယ်ရေး တပ်ဖွဲ့ဝင် ကိုးဦးတို့ဖြင့် ရှာဖွေကယ်ဆယ်ရေးလုပ်ငန်းများဆောင်ရွက်ခဲ့ရာ နံနက် ၅ နာရီ ၅၀ မိနစ်အချိန်တွင် အမြင့်ပေ ၂၀၀၀ ခန့်သို့ရောက်ရှိခဲ့ပြီး အမျိုးသမီးစီး ဖိနပ်တစ်ရံ တွေ့ရှိခဲ့သည်။

ဇွန် ၂၆ ရက်၊ နံနက် ၉ နာရီ ၁၅ မိနစ်အချိန်တွင် ဘားအံမြို့နယ်ရဲတပ်ဖွဲ့မှ တပ်ဖွဲ့ဝင်များ၊ မာဃလူမှုကယ်ဆယ်ရေးအဖွဲ့မှ အဖွဲ့ဝင်များ၊ ပြည်နယ်မြေတိုင်းအဖွဲ့မှ Drone အဖွဲ့များ၊ ပတ်ဝန်းကျင်ရှိ ပြည်သူများဖြင့်ပူးပေါင်း၍ ဆက်လက်ရှာဖွေခဲ့ရာ ညနေ ၄ နာရီခွဲအချိန်ထိ ပျောက်ဆုံးသူ၏ ဆိုင်ကယ်သော့ကို သာ ရှာဖွေတွေ့ရှိခဲ့သည်။

ပျောက်ဆုံးနေသူအား ဆက်လက်ရှာဖွေရေးအတွက် ဇွန် ၂၇ ရက်၊ နံနက် ၅ နာရီအချိန်မှ စတင်ဆောင်ရွက်ခဲ့ရာ ပျောက်ဆုံးသူ၏ တည်နေရာအား နံနက် ၁၀ နာရီ ၃ မိနစ်အချိန်ခန့်တွင် တွေ့ရှိခဲ့ပြီး သယ်ဆောင်ရေးလုပ်ငန်းများ ဆက်လက်ဆောင်ရွက်ခဲ့သည်။ မွန်းလွဲ  ၁၂ နာရီ ၃၆ မိနစ်အချိန်တွင် ရဲလုပ်ငန်းပြီးစီး၍ သေဆုံးသူရုပ်အလောင်းအား ဒေသခံများ၏လမ်းပြမှုဖြင့် တောင်ပတ်လမ်းမှ သယ်ဆောင်ခဲ့ကြောင်း၊ မွန်းလွဲ ၁ နာရီ ၄၅ မိနစ်အချိန်တွင် တောင်ခြေသို့ရောက်ရှိပြီး ရုပ်အလောင်းအား လူနာတင်ယာဉ်ဖြင့် ဘားအံပြည်သူ့ဆေးရုံသို့ ပို့ဆောင်ခဲ့ကြောင်း မြန်မာနိုင်ငံမီးသတ်တပ်ဖွဲ့၏ သတင်းထုတ်ပြန်ချက်အရ သိရသည်။

အဆိုပါ အမျိုးသမီးမှာ ဘားအံမြို့၊ အမှတ် (၆) ရပ်ကွက်၊ သီရိဈေးအနောက်ဘက်ရှိ အမျိုးသမီးဘော်ဒါဆောင်တွင် နေထိုင်၍ ဘားအံတက္ကသိုလ်၊ သတ္တဗေဒ ဂုဏ်ထူးတန်းပထမနှစ်တွင် တက်ရောက်နေသူဖြစ်ကြောင်း သိရသည်။

(သူရိန်)