ရန်ကုန် ဇွန် ၂၅
ရန်ကုန်မြောက်ပိုင်းခရိုင်၊ မင်္ဂလာဒုံမြို့နယ်၌ COVID-19 ရောဂါကာကွယ်ရန် နေအိမ်မှ ပြင်ပသို့ ထွက်ခွာတိုင်း ပါးစပ်/ နှာခေါင်းစီး(Mask)များတပ်ဆင်ကြရန်နှင့် လိုက်နာဆောင်ရွက်ခြင်း မရှိသူများအား ဒဏ်ငွေဆောင်ခြင်းဖြင့် အရေးယူဆောင်ရွက်ခြင်းကို ဇွန် ၂၄ ရက်၊ နံနက် ၉ နာရီခွဲက ရွှေနံ့သာကျေးရွာအုပ်စု၊ အုပ်ချုပ်ရေးမှူးရုံးရှေ့ တွင် ဆောင်ရွက်ခဲ့ကြောင်း သိရသည်။
နှာခေါင်းစီး(Mask)များတပ်ဆင်နိုင်ရေး လုပ်ငန်းများဆောင်ရွက်ရာတွင် မြို့နယ်အုပ်ချုပ်ရေးမှူး ဦးဇော်လင်းနှင့် မြို့နယ် ရဲတပ်ဖွဲ့မှူး ရဲမှူးအပါလွင်တို့ဦးဆောင်၍ မြို့နယ်အဆင့် COVID-19 ကော်မတီဝင်များ၊ မီးသတ်တပ်ဖွဲ့ဝင်များ၊ ရပ်ကွက်အုပ်ချုပ်ရေးမှူးနှင့်အဖွဲ့ဝင်များ၊ လူမှုရေးအသင်းအဖွဲ့များ ပူးပေါင်း၍ လမ်းသွားလမ်းလာများအား နှာခေါင်းစီး(Mask)များ တပ်ဆင်ပြီးမှ အပြင်ထွက်စေရန် အသိပညာပေးခဲ့ပြီး နှာခေါင်းစီး(Mask)မတပ်ဆင်ဘဲ ထွက်ခွာသွားလာနေသူ အမျိုးသား ၆၆ ဦးနှင့် အမျိုးသမီး ၁၀ ဦး၊ စုစုပေါင်း ၇၆ ဦးတို့အား ဒဏ်ငွေဆောင်ခြင်းဖြင့် အရေးယူဆောင်ရွက်ခဲ့ကြောင်း သိရသည်။
မင်္ဂလာဒုံမြို့နယ်အတွင်းရှိ ပြည်သူများအနေဖြင့် မလိုအပ်ဘဲ အပြင်မထွက်ကြရန်နှင့် အပြင်ထွက်ရန် လိုအပ်ပါက ပါးစပ်/နှာခေါင်းစီး(Mask)များ တပ်ဆင်ပြီးမှသွားလာရန်၊ လက်များကိုမကြာခဏဆေးကြော သန့်စင်ရန် ပညာပေးနှိုးဆော်ခဲ့ကြောင်း သိရသည်။
ဇင်ငြိမ်း(ပြန်/ဆက်)