COVID-19 ရောဂါကို အရေးပေါ်ကုသရန် hydroxychloroquine ဆေး အသုံးပြုခွင့်ပေးထားခြင်းကို FDA ပြန်ရုပ်သိမ်း

ဇွန် ၁၆ ဝါရှင်တန်

ငှက်ဖျားရောဂါကုသသည့် hydroxychloroquine ဆေးကို ကိုရိုနာဗိုင်းရပ်စ် ကုသရာတွင် အရေးပေါ် အသုံးပြုခွင့်ပေးထားခြင်းကို အမေရိကန်နိုင်ငံ အစားအသောက်နှင့် ဆေးဝါးကွပ်ကဲမှုအာဏာပိုင်အဖွဲ့(FDA)က ပြန်ရုပ်သိမ်းခဲ့သည်။ စမ်းသပ်အသုံးပြုမှု သက်သေအထောက်အထားသစ်အရ hydroxychloroquine ဆေးက ဗိုင်းရပ်စ်ကို ဆန့်ကျင်တိုက်ဖျက်နိုင်သည့် အာနိသင် ထုတ်ပေးသည်ဟု ယုံကြည်စရာမရှိကြောင်း FDA က ပြောသည်။ COVID-19 ရောဂါ ကာကွယ်နိုင်ရန် hydroxychloroquine ဆေးသောက်နေသည်ဟု ပြောခဲ့ဖူးသည့် အမေရိကန်သမ္မတ ဒေါ်နယ်ထရမ့်က ယင်း၏စကားများကို ပြန်လည်ကာကွယ်သွားခဲ့သည်။

FDA ၏ ဆုံးဖြတ်ချက်နှင့်ပတ်သက်၍ ဒေါ်နယ်ထရမ့်က '' ကျွန်တော်လည်း အဲဒီဆေးသောက်ခဲ့တာပဲ။ အဆင်ပြေသလို ခံစားရပါတယ်။ ကျွန်တော် ဆေးသောက်တာ ၂ ပတ်ကြာတယ်။ ဒါနဲ့ပတ်သက်ပြီး စောဒကတက်စရာမရှိပါဘူး။ အခု ကျွန်တော် ဒီမှာရှိနေတာပဲ။ ကျွန်တော်တို့တွေ ရှိနေသေးတာပဲ''ဟု ပြောသည်။ hydroxychloroquine ဆေးက ယင်းတို့၏အသက်ကို ကယ်တင်ပေးခဲ့သည်ဟု လာပြောသူ အများအပြားရှိကြောင်း ဒေါ်နယ်ထရမ့်က ဆိုသည်။

ပြီးခဲ့သည့်မတ်လတွင် FDA က ဝေဒနာပြင်းပြင်းထန်ထန် ခံစားနေရသည့် ကိုရိုနာဗိုင်းရပ်စ်လူနာများကို အရေးပေါ်အခြေအနေမျိုးတွင် hydroxychloroquine ဆေးအသုံးပြုနိုင်သည်ဟု ခွင့်ပြုပေးခဲ့သည်။ သို့သော် hydroxychloroquine ဆေးက ကိုရိုနာဗိုင်းရပ်စ်ကို ကုသရာတွင် ထိရောက်မှုမရှိသကဲ့သို့ ရောဂါကူးစက်မခံရအောင် ကာကွယ်ပေးနိုင်ခြင်းမရှိကြောင်း ပြီးခဲ့သည့်တနင်္လာနေ့တွင် FDA က ဆုံးဖြတ်ခဲ့သည်။       

(KNT)