ရထားခရီးစဉ်များ ဇွန်လလယ်မှစတင်၍ တိုးချဲ့ပြေးဆွဲ
ရန်ကုန် ဇွန် ၁၅
မြန်မာ့မီးရထားအနေဖြင့် ရထားစီးခရီးသည်များအဆင်ပြေစေရေးနှင့် Covid-19 ရောဂါကာကွယ် ထိန်းချုပ်နိုင်ရေးအတွက်ရည်ရွယ်၍ လမ်းညွှန်ချက်များနှင့်အညီ ဇွန် ၁၆ ရက်မှစတင်ကာ ခရီးဝေးရထား များနှင့် ရန်ကုန်မြို့ပတ်ရထားများကို တိုးချဲ့ပြေးဆွဲသွားမည်ဖြစ်ကြောင်း မြန်မာ့မီးရထားမှ သိရသည်။ လက်ရှိပြေးဆွဲလျက်ရှိသောရထားများအပြင် ထပ်မံတိုးချဲ့ပြေးဆွဲပေးမည့်ရထားခရီးများကို အောက်တွင် ဖော်ပြပေးထားသည်။
ခရီးဝေးပြေးဆွဲပေးမည့်ရထားခရီးစဉ်များမှာ ရန်ကုန် - မန္တလေးလမ်းပိုင်း အမှတ် ၅ အဆန်ရထားသည် ရန်ကုန်မှ ညနေ (၃) နာရီတွင် စတင်ထွက်ခွာမည်ဖြစ်ပြီး အမှတ်၆ အစုန်ရထားသည် မန္တလေးမှ ညနေ ၃ နာရီတွင် စတင်ထွက်ခွာပေးမည်။
ရန်ကုန် - မော်လမြိုင်လမ်းပိုင်း အမှတ် ၈၁ အဆန်ရထားသည် ရန်ကုန်မှ ည ၈ နာရီ ၁၅ မိနစ်တွင် ထွက်ခွာပေးမည်ပြီး အမှတ် ၈၂ အစုန်ရထားသည် မော်လမြိုင်မှ ည ၈ နာရီတိတိတွင် ထွက်ခွာပေးမည်ဖြစ် သည်။ ရန်ကုန် - ပြည်လမ်းပိုင်း အမှတ် ရ၁ အဆန်ရထားသည် ရန်ကုန်မှ မွန်းလွဲ ၁ နာရီတိတိတွင်ထွက်ခွာ မည်ဖြစ်ပြီး အမှတ် ၇၂ အစုန်ရထားသည် ပြည်ဘူတာမှ ည ၁၀ နာရီခွဲအချိန်တွင် ထွက်ခွာပေးမည်ဖြစ်သည့် အပြင် မန္တလေး - မြစ်ကြီးနား လမ်းပိုင်းအမှတ် ၅၇ အဆန်ရထားသည် မန္တလေးမှ မနက် ၈နာရီ ၄၅ မိနစ် အချိန်တွင်ထွက်ခွာပြီး အမှတ် ၅၈ အစုန်ရထားသည် မြစ်ကြီးနားမှ ညနေ ၄ နာရီတွင်ထွက်ခွာပေးမည်ဖြစ် ကြောင်း သိရသည်။
ရန်ကုန်မြို့ပတ်လမ်းပိုင်းအနေဖြင့် မနက်ပိုင်းနှင့် ညနေပိုင်း ရုံးချိန်ရထားများသည် ခရီးသည်စီးနင်းမှု များပြားသည့်အတွက် ရန်ကုန်-အင်းစိန်ကြား၊ ရန်ကုန် - ပုရွက်ဆိတ်ကုန်းကြားနှင့် ရန်ကုန် - တိုးကြောင် ကလေးကြားတို့တွင် မနက်ပိုင်းနှင့် ညနေပိုင်းအချိန်များ၌ အစုန်အဆန်ရထားတစ်စီးစီ တိုးချဲ့ပြေးဆွဲပေးသွား မည်ဖြစ်ကြောင်း သိရသည်။ ရန်ကုန်မြို့ပတ်ရထားပြေးဆွဲမှုမှာ ရထားတွဲဆိုင်း(၈)ဆိုင်းအသုံးပြုနေပြီး စီးရေ (၄၀) နေ့စဉ်ပြေးဆွဲပေးလျက်ရှိရာ ဇွန် ၁၆ မှစ၍ ရထားတွဲဆိုင်း (၁၁)ဆိုင်း၊ ရထားစီးရေ (၅၂) စီးပြေးဆွဲပေး သွားမည်ဖြစ်ကြောင်း သိရသည်။ ရထားလက်မှတ်ခများမှာ စျေးနှုန်းပြောင်းလဲခြင်းမရှိဘဲ ရထားအချိန်စာရင်း အသေးစိတ်ကို သက်ဆိုင်ရာဘူတာများတွင် ကြေညာပေးသည်။
အောင်အောင်
