ဒေါ်လာသန်း ၃၀၀ ကျော်တန် ဒုံးကျည်များ ဖင်လန်ကို ရောင်းချရန် အမေရိကန်အတည်ပြု

ဝါရှင်တန်  နိုဝင်ဘာ   ၃၀

ဒေါ်လာ ၃၂၃ သန်းတန်ကြေးရှိ AIM 9X Block II နည်းဗျူဟာမြောက်ဒုံး ကျည်များနှင့် AGM-154 Joint Stand Off Weapons များကို ဖင်လန်နိုင်ငံသို့ ရောင်းချရန် အတည်ပြုလိုက်ကြောင်းအမေရိကန်ကာကွယ်ရေးဝန်ကြီးဌာန က နိုဝင်ဘာ ၂၉ ရက်တွင် ကြေညာ သည်။

ယင်းသို့ ရောင်းချမှုသည်ဖင်လန် နိုင်ငံ၏ ဝေဟင်ပစ်စနစ်များနှင့်မြေပြင် ပစ်လက်နက်များ၏ စွမ်းရည်ကိုမြှင့်တင် ပေးမည်ဖြစ်ပြီး ဒေသတွင်းနိုင်ငံများနှင့် အမေရိကန်တို့၏ ဆက်ဆံရေးအပေါ် သက်ရောက်မှုရှိမည်ဖြစ်ကြောင်း ပင်တဂွန်စစ်ဌာနချုပ်၏ ထုတ်ပြန်ချက် တွင် ဖော်ပြထားသည်။

AIM 9X Block II ၄၈ စင်းနှင့်  AGM-154 အစင်း ၄၀ တို့ကိုရောင်းချမည့်ကြေညာချက်သည်ဖင်လန်နှင့် ဆွီဒင်တို့ကို နေတိုးအဖွဲ့ဝင်အဖြစ်ရယူရန် တွန်းအား ပေးခဲ့သည့်ရုရှား-ယူကရိန်းစစ်ပွဲ ကိုး လကျော်ကာလတွင် ထွက်ပေါ်လာခြင်း ဖြစ်သည်။

အမေရိကန်နိုင်ငံခြားရေးဝန်ကြီးဌာနကရောင်းချမှုကိုအတည်ပြုထား ပြီးကာကွယ်ရေး၊ လုံခြုံရေးနှင့်ပူးပေါင်း ဆောင်ရွက်ရေးအေဂျင်စီက အမေရိကန် ကွန်ဂရက်သို့ လိုအပ်သည့်အကြောင်း ကြားစာကို တင်ပြထားပြီးဖြစ်ကြောင်း သိရသည်။

ယင်းသို့ရောင်းချမှုသည်မိတ်ဖက်တစ်ဦး၏လုံခြုံရေးကိုမြှင့်တင်ပေးခြင်း ဖြင့်အမေရိကန်ပြည်ထောင်စု၏ နိုင်ငံ ခြားရေးမူဝါဒနှင့်အမျိုးသားလုံခြုံရေးကိုအထောက်အကူဖြစ်စေနိုင်ကြောင်းပင်တဂွန်ကပြောကြားထားသည်။

(Ref:AP)