ရန်ကုန်၊ ဩဂုတ် ၂
ပြည်တွင်းဆန်ဈေးမြင့်တက် နေသည့်အတွက် ဈေးနှုန်း ကျဆင်းစေရန် မြန်မာနိုင်ငံ ဆန်စပါးအသင်းချုပ်အနေဖြင့် ဆန်ကုန်သည်များနှင့် ညှိနှိုင်း ဆောင်ရွက်နေကြောင်း သိရ သည်။
လတ်တလော ပြည်တွင်း ဆန်ဈေးကွက်တွင် အခြေခံ လူတန်းစားပြည်သူများ စားသုံး သည့် ဆန်အမျိုးအစားများ သည် အနည်းငယ်ဈေးမြင့်တက် နေပြီး စစ်ကိုင်းတိုင်း၊ ရွှေဘိုဒေသ ထွက် ရွှေဘိုပေါ်ဆန်းဈေးမြင့် တက်သွားခြင်းသည် စိုက်ပျိုး ဧကလျော့နည်းခြင်း၊ ဒေါ်လာ ဈေးနှင့်စက်သုံးဆီဈေးမတည် ငြိမ်ခြင်းများအပါအဝင် သယ်ယူ ပို့ဆောင်ရေးစရိတ်မြင့်တက်ခြင်း များကြောင့်ဖြစ်သည်ဟု သိရ သည်။
ထို့ကြောင့် ပြည်တွင်း ဆန်ဈေးတည်ငြိမ်ရန်အတွက် ဆန်ကုန်သည်များနှင့် ညှိနှိုင်း နေပြီး ဖြစ်သင့်သည့်ဈေးနှုန်းနှင့် ရောင်းချရန် မေတ္တာရပ်ခံထား ကြောင်း မြန်မာနိုင်ငံ ဆန်စပါး အသင်းချုပ်တာဝန်ရှိသူတစ်ဦး က ပြောသည်။
လက်ရှိ ဆန်ဈေးကွက်တွင် ဧည့်မထ ဆန်တစ်အိတ်လျှင် ကျပ် ၃၀၅၀၀ မှ ကျပ် ၃၁၀၀၀၊ ပေါ်ဆန်းတစ်အိတ်လျှင် ကျပ် ၅၀၀၀၀ မှ ကျပ် ၅၂၀၀၀ ၊ ဖျာပုံ ပေါ်ဆန်းတစ်အိတ်လျှင် ကျပ် ၅၃၀၀၀ မှ ကျပ် ၅၅၀၀၀၊ ရွှေဘိုပေါ်ဆန်းတစ်အိတ်လျှင် ကျပ် ၇၃၀၀၀ မှ ကျပ် ၈၀၀၀၀ အထိ ပေါက်ဈေးရှိနေကြောင်း သိရသည်။
မြန်မာနိုင်ငံတွင် နွေစပါးနှင့် မိုးစပါးများမှ စပါးတန်ချိန် ၂၇ သန်းကျော်ထွက်ရှိပြီး၊ ပြည်ပသို့ နှစ်စဉ် ဆန်နှင့် ဆန်ကွဲတန်ချိန်၂ သန်းကျော်မှ ၃ သန်းကျော်အထိ တင်ပို့လျက်ရှိသည်။ ဥမ္မာစိုး