ချီကာဂိုမြို့တွင် နှစ် ၃၀ အတွင်းဆူပူအုံကြွမှုကြောင့် လူအများဆုံးသေဆုံးသည့်နေ့ ကြုံတွေ့
ဝါရှင်တန် ဇွန် ၁၀
ချီကာဂိုမြို့မှာနှစ် ၃၀ ကာလအတွင်းဆူပူအုံကြွမှုကြောင့် တစ်ရက်တာလူသေဆုံးမှုအများဆုံး ဖြစ်ပွားသည့်နေ့ ကြုံတွေ့ခဲ့သည်။ မေလ ၃၀ ရက်မှ ၃၁ ရက်ကြား ၂၄ နာရီကာလအတွင်းချီကာဂိုမြို့တွင် ဆူပူအုံကြွမှုများကြောင့် အနည်းဆုံးလူ ၁၈ ဦးသေဆုံးခဲ့သည်။
မင်နီယာပိုလစ်မြို့တွင် ရဲအရာရှိကြောင့် လက်နက်မဲ့ လူမည်းအမျိုးသားဂျော့ဖလွိုက် သေဆုံးခဲ့သည့်အပေါ် မကျေနပ်ခြင်းကြောင့် ဆန္ဒပြရာမှ ဆူပူအုံကြွမှုများဖြစ်ပွားခဲ့ပြီးအဓိကရုဏ်းဖြစ်ရပ်များ၊ လုယက်ဖောက်ထွင်းမှုများဖြစ်ပွားခဲ့သည်။
မေလနောက်ဆုံးပတ်၏ အားလပ်ရက်သုံးရက်အတွင်းပစ်ခတ်ခံရသူ ၈၅ ဦးရှိခဲ့ပြီး လူ၂၄ ဦးသေဆုံးခဲ့သည်ဟု ချီကာဂိုတက္ကသိုလ်၏ မှုခင်းဓာတ်ခွဲခန်းကိန်းဂဏန်းအချက်အလက်များတွင် ဖော်ပြထားသည်။
အဆိုပါဖြစ်ရပ်တွင် သေဆုံးခဲ့သူအများစုမှာလူမည်းများဖြစ်သည်။ သေဆုံးသူ၊ ဒဏ်ရာရသူများတွင် ကျောင်းသား၊ ကျောင်းသူများ၊ မိဘများ၊ သက်လတ်ပိုင်းအလုပ်သမားများပါဝင်နေသည်။
ချီကာဂိုမြို့သမိုင်းတစ်လျှောက် ဒုတိယမြောက် လူသေဆုံးမှုအများဆုံးနေ့မှာ ၁၉၉၁ ခုနှစ် သြဂုတ်လ ၄ ရက်နေ့ဖြစ်ပြီးလူ ၁၃ ဦးအသတ်ခံခဲ့ရသည်။
သို့သော် ၁၉၉၁ ခုနှစ်မတိုင်မီကာလကကိန်းဂဏန်းအချက်အလက်များမှာတိကျမှုအားနည်းခြင်းကြောင့် ၂၀၂၀ ပြည့်နှစ် မေလ ၃၀ ရက်မှ ၃၁ ရက်ကြားကာလမှာအနည်းဆုံးနှစ် ၆၀ အတွင်းချီကာဂိုမြို့တွင် လူသေဆုံးမှုအများဆုံးနေ့ဖြစ်ဖွယ်ရှိသည်ဟုသုတေသီများကဆိုသည်။
(KNT)
