ခြောက်ဘာသာဂုဏ်ထူးရှင် မငြိမ်းမို့မို့ထွန်းနှင့် တွေ့ဆုံမေးမြန်းခြင်း

ကျွန်းလှ၊ ဇွန် ၂၀

ယခုနှစ် တက္ကသိုလ်ဝင်တန်းစာမေးပွဲကို ကျွန်းလှမြို့နယ်တွင် ၂၄၉ ဦးဖြေဆိုခဲ့ရာ ခြောက်ဘာသာဂုဏ်ထူးရှင်တစ်ဦး၊ ငါးဘာသာ ဂုဏ်ထူးရှင် တစ်ဦး၊ သုံးဘာသာ ၁၃ ဦး၊ နှစ်ဘာသာ ၂၉ ဦး၊ တစ်ဘာသာ ၄၀ ဦးအပါအဝင် စုစုပေါင်း ၂၄၉ ဦးအောင်မြင်ခဲ့ ပြီး အောင်ချက်ရာခိုင်နှုန်းမှာ ၅၆ ဒသမ ၅ ရာခိုင်နှုန်း အောင်မြင်ခဲ့ကြောင်း သိရသည်။

စစ်ကိုင်းတိုင်းဒေသကြီး၊ ကျွန်းလှမြို့နယ် ၂၀၂၂ ခုနှစ်၊ တက္ကသိုလ်ဝင်စာမေးပွဲ ဝိဇ္ဇာဘာသာ တွဲတွင် မြန်မာတစ်နိုင်ငံလုံး အမှတ်အများဆုံး ပထမရရှိသူ အထက(သစ်ရာမြိုင်)ကျောင်းက ခြောက်ဘာသာ ဂုဏ်ထူးရှင် မငြိမ်းမို့မို့ထွန်းနှင့် တွေ့ဆုံမေးမြန်းခြင်း။

မေး ။ ။သမီးအနေနဲ့ ခြောက်ဘာသာ ဂုဏ်ထူးရရှိအောင် ပြင်ဆင်ကြိုးစားခဲ့ပုံကို ပြော ပေးပါ။

ဖြေ ။ ။သမီးက နဝမတန်း ဖြေဆိုပြီးချိန် ကစပြီး၊ ကျက်စာတွေကို ကျက်ခဲ့ပါတယ်။ကျောင်း ပိတ်ချိန်မှာ ရုပ်မြင်သံကြားက ထုတ်လွှင့်တဲ့ ပညာရေးသင်ခန်းစာတွေကိုလည်း လေ့လာခဲ့ပါ တယ်။ ကျောင်းစဖွင့်တော့လည်း ဆရာ၊ ဆရာမ တွေ နေ့စဉ်သင်ကြားတဲ့ သင်ခန်းစာတွေကို အာရုံစူးစိုက်နားထောင်ပြီး ပုံမှန်ကျက်မှတ်ခဲ့ပါ တယ်။

မေး ။ ။အခုလို အောင်မြင်ပြီး မြန်မာ တစ်နိုင်ငံလုံးမှာ အမှတ်အများဆုံး ရရှိတဲ့အတွက် သမီးရဲ့ရင်ထဲက ခံစားမှုကို ရှင်းပြပေးပါအုံး။

ဖြေ ။ ။သမီး ခြောက်ဘာသာ ဂုဏ်ထူးနဲ့ မြန်မာတစ်နိုင်ငံလုံး ဝိဇ္ဇာဘာသာတွဲမှာ အမှတ် အများဆုံးရရှိတဲ့အတွက် ပြောမပြနိုင်‌လောက် အောင် ဝမ်းသာပါတယ်။ ဆရာ၊ ဆရာမတွေ၊ အဘိုးအဘွားတွေ၊ မိခင်နဲ့ဆွေမျိုးတွေလည်း ဝမ်းသာနေကြပါတယ်။ သမီးကို ငယ်စဉ်ကတည်း က ကျွေးမွေးပြုစုစောင့်ရှောက်ခဲ့တဲ့ မိခင်နဲ့ ဂုဏ်ထူးရအောင် သင်ကြားပေးတဲ့ ဆရာ၊ ဆရာမတွေကိုလည်း ဦးတင်ကန်တော့ပြီး  အထူး ကျေးဇူးတင်ရှိပါတယ်။   

မေး ။ ။တက္ကသိုလ်ဝင် စာမေးပွဲမှာ အခုလိုအမှတ် ကောင်းစွာနဲ့ အောင်မြင်တဲ့ အတွက် သမီးရဲ့ရည်မှန်း ချက်ကို သိပါရစေ။

ဖြေ ။ ။ သမီးကတော့ နိုင်ငံတော်အတွက် ထူးချွန် ထက်မြက်တဲ့ ကျောင်းသား၊ ကျောင်းသူတွေကို မွေးထုတ် ပေးမယ့်  ပညာရေး တက္ကသိုလ်ဆက်တက်ဖို့ ရည် ရွယ်ထားပြီး  ပါရဂူဘွဲ့ (ph.D) ရယူဖို့အထိ မျှောမှန်းထားပါ တယ်။

‌မေး ။ ။သမီး အနေနဲ့ မျိုးဆက်သစ် ကျောင်းသား၊ ကျောင်းသူတွေကို အကြံပြုချက် တိုက်တွန်းချက်လေး ပြောပေး စေလိုပါတယ်။

ဖြေ ။ ။သမီးလို ဆရာ၊ ဆရာမများရဲ့ သင်ကြားမှုကို ဂရုတစိုက် လေ့လာကျက်မှတ် ဖို့နဲ့ မိဘများရဲ့ ဆိုဆုံးမမှုကို နားထောင်ကြပြီး မိမိတို့ တက်လှမ်းလိုတဲ့ ပန်းတိုင် ရောက်အောင် ကြိုးစားကြပါလို့ အကြံပြု တိုက်တွန်းလိုပါတယ်။

မျိုးဝင်းညို၊ ဇင်ဇင်အောင်