ပွင့်ဖြူမြို့နယ် ကြီးအုံကြီးဝ တမံ ရေပိုလွှဲ ၃ ပေခွဲခန့် ဆက်လက်ရေကျော်လျက်ရှိ
ရန်ကုန် စက်တင်ဘာ ၂၀
မကွေးတိုင်းဒေသကြီး၊ ပွင့်ဖြူမြို့နယ် တွင် ယခုရက်ပိုင်းနေ့စဉ်မိုးများ ရွာသွန်း နေသဖြင့် ဒေသခံတောင်သူများ စိုက်ပျိူး ရေးအတွက် မှီခိုအားထားရသည့်ကြီးအုံ ကြီးဝတမံတွင် မိုးရေဝင်ရောက်မှုရှိနေပြီး စက်တင်ဘာ ၁၉ ရက် နံနက် ၆ နာရီ တိုင်းထွာချက်အရ တမံရေပြည့်မှတ်ဖြစ် သည့် ပေ ၃၄၀ အထက် တမံရေပိုလွှဲမှ ၃ ပေခွဲခန့် ဆက်လက်ရေပျော်ကျလျက် ရှိကြောင်း အဆိုပါကြီးအုံကြီးဝတမံမှ တာဝန်ခံ(AE) ဦးစိုးတင့်ထံမှ သိရသည်။
"ယခုရက်ပိုင်း မိုးရွာသွန်းမှုတွေ စိပ်နေတဲ့အတွက် ကြီးအုံကြီးဝတမံမှာ မိုးရေဝင်ရောက်မှုတိုးကာ တမံရေပိုလွှဲမှ ဆက်လက်ရေပျော်ကျမှုရှိနေပါတယ်။ စက်တင်ဘာ ၁၉ ရက် နံနက် တိုင်းထွာ ရာမှာ တမံရေပြည့်အမှတ်ဖြစ်တဲ့ ပေ ၃၄၀ အထက် ရေပိုလွှဲကနေ ၃ ဒသမ ၅ ပေခန့်ရေကျော်ကျမှုရှိပါတယ်။ တမံ ရေဝင်ရောက်မှုအခြေအနေနဲ့ တမံရဲ့ ကြံ့ခိုင်မှုတွေကို နေ့စဉ်မပြတ်စောင့် ကြည့်နေပါတယ်။ ယခု လက်ရှိ တမံ ရေပိုလွှဲမှ ရေကျော်ကျမှုဟာ စိုးရိမ်ဖွယ်ရာ အခြေအနေမရှိပါဘူး။ ဒေသခံပြည်သူ တွေကိုလည်း တမံရေဝင်ရောက်မှု အခြေအနေနဲ့ ရေပိုလွှဲကနေ ရေကျော် ကျမှုတွေကို နေ့စဉ်အသိပေး နှိုးဆော် ထားပါတယ် " ဟု အဆိုပါကြီးအုံကြီးဝ တမံတာဝန်ခံ(AE) ဦးစိုးတင့်က ပြော ခဲ့သည်။
AMH(မြို့တော်သတင်း)
