ရွှေဆိုင်တစ်ဆိုင်ကို သေနတ်ပြ၍ ခြိမ်းခြောက်လုယူရန် ကြိုးစားခဲ့သူ ၅ ဦးအနက်မှ တစ်ဦး ပစ္စတိုသေနတ် တစ်လက်နှင့်အတူ ဖမ်းဆီးရမိ
ရန်ကုန်၊ ဇူလိုင် ၁၂
ရန်ကုန်တိုင်းဒေသကြီး၊ မရမ်းကုန်း မြို့နယ် ရွှေဆိုင်တစ်ဆိုင်ကို သေနတ်ပြ၍ ခြိမ်းခြောက်လုယူရန် ကြိုးစားခဲ့သူ ၅ ဦးကို လုံခြုံရေးတပ်ဖွဲ့ဝင်များနှင့်အတူ ပြည်သူလူထုမှ ပူးပေါင်းပါဝင်ဖမ်း ဆီးခဲ့ရာ လုယူရန်ကြိုးစားခဲ့သူ အမျိုးသား ၁ ဦးကို ပစ္စတိုသေနတ် ၁ လက်နှင့်အတူ ဖမ်းဆီးရမိခဲ့ကြောင်း သိရသည်။
ဖြစ်စဉ်မှာ ဇူလိုင် ၁၁ ရက်၊ နံနက် ၈ နာရီ ၅ မိနစ်ခန့်တွင် မရမ်းကုန်းမြို့နယ်၊ ဘုရင့်နောင်(၂)ရပ်ကွက်၊ သမိုင်း ဘူတာရုံလမ်း၊ အမှတ်(၄၅)၊ သမိုင်း ခုံးကျော် တံတားအဆင်းရှိ “လှသီတာ” ရွှေဆိုင်သည် ဖွင့်လှစ် ရောင်းချရန် ပြင်ဆင်နေစဉ် အဆိုပါ ဆိုင်ရှေ့သို့ YGN 7D---- TOYOTA CROWN အဖြူရောင်ယာဉ် တစ်စီး ရောက်ရှိလာပြီး ယာဉ်ပေါ်မှ အမျိုးသား ၅ ဦးက ဆိုင်အတွင်းဝင်ရောက်ကာ သေနတ်ပြ ခြောက်လှန့်၍ ဆိုင်အတွင်းရှိ ရွှေထည်ပစ္စည်းများကို လုယူရန် ကြိုးစားခဲ့သည်ကို ဆိုင်ရှင်ဖြစ်သူနှင့် လုံခြုံရေးဝန်ထမ်းများ၊ ဆိုင်ဝန်ထမ်းများ က ဝိုင်းဝန်းဖမ်းဆီးခဲ့ရာ အကြမ်းဖက်သူ ၄ ဦးမှာ အဆိုပါ မော်တော်ယာဉ် ဖြင့်ပင် မောင်းနှင်ထွက်ပြေးသွားခဲ့ပြီး လှိုင်သာယာမြို့နယ်၊ မီးခွက်ဈေး၊ မီးခွက် (၁)လမ်း၊ အမှတ်(၂၈၉)နေ ဝေယံ(ခ)အသေးလေး၊ (၁၈)နှစ် (ဘ) ဦးမျိုးဇော်ကို ပစ္စတိုသေနတ် ၁ လက်၊ ၎င်းကျည် ၈ တောင့်နှင့် ကျည်ခွံ ၁ ခု တို့ နှင့်အတူ ဖမ်းဆီးရရှိခဲ့သည်။
ထိုကဲ့သို့ သေနတ်ပြခြောက်လှန့်၍ ရွှေထည်ပစ္စည်းများကို လုယူရန် ကြိုးစားခဲ့ပြီး ထွက်ပြေးသွားသူများကို ဖမ်းဆီးရမိနိုင်ရေး လုံခြုံရေးတပ်ဖွဲ့ဝင် များက စစ်ဆေးရှာဖွေခြင်းများ ဆက်လက် ဆောင်ရွက်လျက်ရှိကြောင်း နှင့် ပြည်သူလူထုမှ ပူးပေါင်းပါဝင်ဆောင် ရွက်မှုကြောင့် ဖမ်းဆီးရမိသူ ဝေယံ(ခ)အသေးလေးကို စစ်ဆေး၍ ဥပဒေနှင့် အညီ ထိရောက်စွာ အရေးယူဆောင်ရွက် သွားမည်ဖြစ်ကြောင်း သိရသည်။
ဆွေဦး
