တောင်အာဖရိကနိုင်ငံ၌ ပစ်ခတ်မှုများစွာဖြစ်ပွား တစ်ရက်အတွင်း လူ ၁၁ ဦး သေဆုံး
ကိပ်တောင်း၊ မေ ၁၈
တောင်အာဖရိကနိုင်ငံရဲတပ်ဖွဲ့၏ မေလ ၁၆ ရက်ပြောကြားချက် အရ နိုင်ငံမြို့တော် ကိပ်တောင်းတွင် မေလ ၁၅ ရက်၌ သေနတ် ပစ်ခတ်မှုများစွာဖြစ်ပွားခဲ့ပြီး လူ ၁၁ ဦးသေဆုံးကာ ၇ ဦး ပြင်းထန်စွာ ဒဏ်ရာရရှိခဲ့ကြောင်း သိရှိရသည်။
ကိပ်တောင်းရဲတပ်ဖွဲ့၏ ထုတ်ပြန်ကြေညာချက်အရ ကိပ်တောင်း မြို့ Khayelitsha ဒေသတွင် မေလ ၁၅ ရက်၌ သေနတ်ပစ်ခတ်မှုများစွာဖြစ်ပွားခဲ့ကြောင်း ၊ ယင်းနေ့နံနက်ပိုင်းတွင် ပထမတစ်ကြိမ် သေနတ်ပစ်ခတ်မှု စတင်ဖြစ်ပွားခဲ့ပြီး အမျိုးသားတစ်ဦးသေဆုံးခဲ့ကာ သေဆုံးသူထံတွင် သေနတ်ဒဏ်ရာများစွာတွေ့ရကြောင်း ၊ ယင်းနေ့ ညနေပိုင်းတွင် သေနတ်ပစ်ခတ်မှု နောက်တစ်ကြိမ်ဖြစ်ပွားခဲ့ပြီး ယင်း ပစ်ခတ်မှုသည် ပထမသေနတ်ပစ်ခတ်မှုနှင့် ဆက်စပ်မှုရှိသည်ဟု ယုံကြည်ရကြောင်း ၊ ဒုတိယပစ်ခတ်မှုတွင် ဆိုမာလီနိုင်ငံသား တစ်ဦး သေဆုံးခဲ့ရပြီး အခြား ဆိုမာလီနိုင်ငံ သားတစ်ဦး ပြင်းထန်စွာဒဏ်ရာ ရရှိခဲ့ကြောင်း ၊ ယင်းပစ်ခတ်မှုဖြစ်ပွားပြီးနောက် မကြာမီမှာပင် အဆိုပါပစ်ခတ်မှု ဖြစ်ပွားသည့်နေရာအနီးတွင် အမျိုးသား ၃ ဦး ထပ်မံ ပစ်သတ်ခံခဲ့ရကြောင်း သိရှိရသည်။
ထို့ပြင် ထုတ်ပြန်ချက်အရ Khayelitsha ဒေသရှိ ကုန်စုံဆိုင် တစ်ခုတွင်လည်း ယင်းနေ့ညနေပိုင်း၌ သေနတ်ပစ်ခတ်မှုဖြစ်ပွား ခဲ့ပြီး အမျိုးသားနှစ်ဦးက အခင်းဖြစ်ပွားရာနေရာတွင် သေဆုံး သွားကြောင်း ၊ ဆိုမာလီနိုင်ငံသား နှစ်ဦးသည် ကုန်စုံဆိုင်အနီးတွင် သေနတ်ပစ်ခတ်ခံရ၍ သေဆုံးသွားခဲ့ကြောင်း ၊ သေနတ်ပစ်ခတ်မှု များကြောင့် လူအများအပြားပြင်းထန်စွာ ဒဏ်ရာရရှိခဲ့ရပြီး ဒဏ်ရာ ရရှိသူများအနက် ၂ ဦးမှာ ဆေးရုံ၌ ကုသမှုခံယူနေစဉ် သေဆုံးခဲ့ရ ကြောင်း သိရသည်။ မျိုးဝင်း ( ref;CNA)
