တရုတ်နိုင်ငံ၏ အာကာသစူးစမ်းလေ့လာရေးယာဉ် အင်္ဂါဂြိုဟ်ပေါ်သို့ဆင်းသက်နိုင် ပေကျင်း

မေ   ၁၆

တရုတ်နိုင်ငံ၏ ပထမဆုံး အင်္ဂါဂြိုဟ်ပေါ်သွားယာဉ်အား သယ် ဆောင်ထားသော ဂြိုဟ်ပေါ်ဆင်းသက်ယာဉ် (lander) သည် ဂြိုဟ်နီ ကြီး(အင်္ဂါဂြိုဟ်)ပေါ်သို့ ဆင်းသက်နိုင်ခဲ့ပြီဖြစ်ကြောင်း တရုတ်နိုင်ငံ အမျိုးသား အာကာသစီမံခန့်ခွဲမှုဦးစီးဌာန (CNSA) က မေ ၁၅ ရက် နံနက်ပိုင်း၌ အတည်ပြုပြောကြားခဲ့သည်။ တရုတ်နိုင်ငံအနေဖြင့် ကမ္ဘာဂြိုဟ်မှလွဲ၍ ဂြိုဟ်တစ်ခုပေါ်သို့ အာကာသယာဉ်ဆင်းသက် နိုင်ခြင်းမှာ ပထမဆုံးအကြိမ်ဖြစ်ကြောင်း သိရသည်။ ၉ မိနစ်ခန့် ကြာမြင့်သည့်   အင်္ဂါဂြိုဟ်လေထုကိုဖြတ်သန်း၍   ဂြိုဟ်ပေါ်သို့ ဆင်းသက်သည့်ဖြစ်စဉ်သည် မြေပြင်ထိန်းချုပ်မှုမရှိဘဲ အာကာသ ယာဉ်၏ အလိုအလျောက်စနစ်ဖြင့် ဆောင်ရွက်ရခြင်းဖြစ်သည့်အတွက် အလွန်ရှုပ်ထွေးနက်နဲကြောင်း တရုတ်နိုင်ငံ အမျိုးသားအာကာသ စီမံခန့်ခွဲမှုဦးစီးဌာန(CNSA) ၏ လကမ္ဘာစူးစမ်းလေ့လာရေးနှင့် အာကာသစီမံကိန်းစင်တာအရာရှိ ကိန်းယန်က ပြောသည်။
ဂြိုဟ်ပတ်လမ်းကြောင်းသွားယာဉ်(orbiter)၊ ဂြိုဟ်ပေါ်ဆင်းသက် ယာဉ်(lander)နှင့် ဂြိုဟ်ပေါ်သွားယာဉ် (rover) ပါဝင်သောထျန်းဝန်-၁ ယာဉ်အား တရုတ်နိုင်ငံတောင်ပိုင်း ဟိုင်နန်ကျွန်းပြည်နယ်ရှိ ဝန်ချန်း အာကာသယာဉ်လွှတ်တင်ရေးစင်တာမှ ၂၀၂၀ ပြည့်နှစ် ဇူလိုင် ၂၃ ရက်က လွှတ်တင်ခဲ့ခြင်းဖြစ်သည်။ ၎င်းမှာ တရုတ်နိုင်ငံက နေအဖွဲ့ အစည်းအတွင်း ဂြိုဟ်စူးစမ်းလေ့လာရေး၏ ပထမခြေလှမ်းဖြစ်ပြီး ဂြိုဟ်ပတ်လမ်းကြောင်းပတ်ခြင်း၊ ဆင်းသက်ခြင်းနှင့် ဂြိုဟ်ပေါ် လှည့်လည်သွားလာခြင်းများကို    လုပ်ငန်းစဉ်တစ်ခုတည်းတွင် ပြီးမြောက်အောင်ဆောင်ရွက်ရန်ရည်ရွယ်ကြောင်း    သိရသည်။ အဆိုပါ အာကာသယာဉ်သည် အာကာသအတွင်း ၇ လနီးပါးကြာ ပျံသန်းပြီးနောက် ဖေဖော်ဝါရီလတွင် အင်္ဂါဂြိုဟ် ဂြိုဟ်ပတ်လမ်း ကြောင်းအတွင်းသို့ဝင်ရောက်ခဲ့ရာ ဂြိုဟ်ပေါ်သို့ ဆင်းသက်မည့် နေရာကို ၂ လကျော်ကြာအချိန်ယူလေ့လာခဲ့ရကြောင်း သိရသည်။
ရဲခေါင်(Ref; Xinhua)