မုဒုံမြို့နယ်၌ ကြက်တိုက်လောင်းကစားပြုလုပ်သူများအား ဖမ်းဆီးရမိ
မုဒုံ ဧပြီ ၁၄
မွန်ပြည်နယ် မုဒုံမြို့နယ်၌ ဧပြီ၁၂ ရက်ကကြက်တိုက်လောင်းကစား ပြုလုပ်သူများကို ဆိုင်ကယ်မျိုးစုံ ၁၀၅ စီး၊ လောင်းကြေးငွေ ၁၂သိန်းကျော်နှင့်အတူ ဖမ်းဆီးရမိခဲ့ကြောင်း သိရသည်။
ဖြစ်စဉ်မှာ ဧပြီ ၁၂ ရက် မွန်းလွဲ ၃ နာရီခွဲတွင် မွန်ပြည်နယ် ရဲတပ်ဖွဲ့မှူးရုံးမှ တပ်ဖွဲ့ဝင်များပါဝင်သော ပူးပေါင်းအဖွဲ့သည် သတင်းအရ မုဒုံမြို့နယ် ကော့ခပုံကျေးရွာအနောက်ဘက် လယ်ကွင်းအတွင်းသို့ သွားရောက်စစ်ဆေးရာ အဆိုပါနေရာ၌ကြက်တိုက်လောင်းကစား ပြုလုပ်နေသူ မုဒုံမြို့နယ် မြို့မ(၂)ရပ်ကွက်နေ ဆံရှည်ပါ ကိုးဦးအားတိုက်ကြက်ဖ ငါးကောင်၊ ငွေကျပ် ၁၂ သိန်း၊ ဆိုင်ကယ် ၁၀၅ စီးတို့နှင့်အတူ တွေ့ရှိ ဖမ်းဆီးရမိခဲ့သဖြင့် ဆံရှည်ပါကိုးဦးအား ဥပဒေနှင့်အညီ အမှုဖွင့်အရေးယူထားကြောင်း သိရသည်။ ဆွေဦး
