အာဂျင်တီးနားနိုင်ငံတွင် အချမ်းသာဆုံးပုဂ္ဂိုလ်များထံမှ အခွန်ငွေ ကောက်ခံမည့်အစီအစဉ် စတင်အကျုံးဝင်
ဗျူနိုအေရိစ် ဇန်နဝါရီ ၃၀
ဆေးဝါးအထောက်အကူပစ္စည်းများ ဝယ်ယူရန်၊ ကိုဗစ်ကပ်ရောဂါကြောင့် ရုန်းကန်နေရသည့် စီးပွားရေး လုပ်ငန်းများကို ပံ့ပိုးပေးရန်အတွက် အာဂျင်တီးနားနိုင်ငံ၏ အချမ်းသာဆုံးပုဂ္ဂိုလ်များထံမှ တစ်လုံးတစ်ခဲ တည်း အခွန်ငွေကောက်ခံမည့်အစီအစဉ် စတင်အကျုံးဝင်လာပြီဖြစ်သည်။
ပီဆိုသန်း ၂၀၀ ( အမေရိကန်ဒေါ်လာ ၂ ဒသမ ၃ သန်း)ကျော် ချမ်းသာသူများအနေဖြင့် အာဂျင်တီးနား နိုင်ငံအတွင်း တရားဝင်ကြေညာထားသည့် ပိုင်ဆိုင်မှုတန်ဖိုး၏ ၃ ရာခိုင်နှုန်း၊ ပြည်ပပိုင်ဆိုင်မှုတန်ဖိုး၏ ၅ ရာခိုင်နှုန်းကျော်ကို အခွန်ငွေပေးဆောင်ရမည်ဖြစ်သည်။ အဆိုပါစည်းမျဉ်းအရ အခွန်ငွေပေးဆောင်ရမည့်သူ ၁၂၀၀၀ နီးပါးရှိသည်။ အချမ်းသာဆုံးပုဂ္ဂိုလ်များထံမှ အခွန်ငွေကောက်ခံမည့်အစီအစဉ်အရ အမေရိကန် ဒေါ်လာ ၃ ဘီလျံရရှိလိမ့်မည်ဟု အာဂျင်တီးနားအစိုးရက မျှော်လင့်ထားသည်။
ရရှိလာသည့်အခွန်ငွေများကို ပညာသင်စရိတ်ပေးအပ်ခြင်းနှင့် လူမှုအထောက်အပံ့များအတွက်လည်း အသုံးပြုမည်ဖြစ်သည်။ သန်းကြွယ်သူဌေးခွန်ဟု တင်စားခေါ်ဝေါ်ကြသည့် အခွန်ကောက်ခံရေးနှင့်ပတ်သက်၍ ပြီးခဲ့သည့်ဒီဇင်ဘာလက အထက်လွှတ်တော်တွင် မဲခွဲဆုံးဖြတ်ရာ ထောက်ခံမဲ ၄၂ မဲ၊ ကန့်ကွက်မဲ ၂၆ မဲဖြင့် အတည်ပြုနိုင်ခဲ့ခြင်းဖြစ်သည်။
(KNT)
