ဒဂုံမြို့သစ်(အရှေ့ပိုင်း)မြို့နယ်တွင် မူးယစ်ဆေးဝါးများ ဖမ်းဆီးရမိ
ရန်ကုန်၊ ဇန်နဝါရီ ၂၄
ဇန်နဝါရီ ၂၃ ရက်နေ့ ၁၃၃၀ အချိန် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင် များသည် ဒဂုံမြို့သစ်(အရှေ့ပိုင်း)မြို့နယ်၊ အမှတ်(၅)ရပ်ကွက်တွင် မသင်္ကာဖွယ်တွေ့ရှိသူ နိုင်လင်းထွန်း(ခ) ဘာဘူ အား စစ်ဆေးရှာဖွေရာ ၎င်းထံမှ စိတ်ကြွရူးသွပ်ဆေးပြား ၂၀၀ ပြား သိမ်းဆည်းရမိခဲ့သဖြင့် မွန်းလွဲ ၁ နာရီ ၄၅ မိနစ်အချိန် ၎င်းနေထိုင်သည့် အမှတ်(၅)ရပ်ကွက်ရှိ အမှတ်(၅/၄၅၃-ခ)၊ အခန်း(၇)သို့ ဝင်ရောက် ရှာဖွေရာ အိပ်ခန်းအတွင်းမှ စိတ်ကြွရူးသွပ်ဆေးပြား ၈,၀၀၀ ပြား၊ ဆေးခြောက် ၀ ဒသမ ၀၁၂ ကီလို၊ အိုက်စ် ၀ ဒသမ ၀၅ ကီလိုနှင့် ဘိန်းဖြူ ၀ ဒသမ ၀၈၆ ကီလိုတို့ကို ထပ်မံသိမ်းဆည်းရမိခဲ့ပါသည်။
ကွင်းဆက်သတင်းအရ ညနေ ၃ နာရီ ၄၀ မိနစ်အချိန်တွင် အဆိုပါနေအိမ်ရှေ့သို့ ရောက်ရှိလာသည့် ဣန္ဒဟန်(ခ)ဣန္ဒ မောင်းနှင် လာသော MARK II အမျိုးအစားမော်တော်ယာဉ်အား စစ်ဆေးရှာဖွေရာ ယာဉ်အတွင်းမှ စိတ်ကြွရူးသွပ် ဆေးပြား ၁၆,၀၀၀ ပြား သိမ်းဆည်းရမိခဲ့သဖြင့် နိုင်လင်းထွန်း(ခ)ဘာဘူ(၂၈)နှစ်၊ ဣန္ဒဟန်(ခ)ဣန္ဒ (၂၉)နှစ်တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာ ဥပဒေအရအရေးယူထားကြောင်း သိရသည်။ ဆွေဦး
