ဆိုင်ကယ်ဖြင့်လှည့်လည်သွားလာ၍ လုယက်မှု(၄)မှု၊ ခိုးမှု(၆)မှု၊ ပါင်း(၁၀)မှု ဖော်ထုတ်နိုင်ခဲ့
ရန်ကုန်၊ ဇန်နဝါရီ ၂၃
ရန်ကုန်တိုင်းဒေသကြီးရဲတပ်ဖွဲ့မှ တပ်ဖွဲ့ဝင်များသည် ဒဂုံမြို့သစ်(ဆိပ်ကမ်း)မြို့နယ် အတွင်း ဆိုင်ကယ်ဖြင့်လိုက်လံ၍ ဆွဲကြိုးဖြတ်လုယက်သူ ရန်နိုင်(ခ)ကိုနိုင်နှင့် ကျော်သက်ပိုင်(ခ) ဓားနှစ်လက် တို့(၂)ဦးကို ဇန်နဝါရီ ၁၁ ရက်တွင် ဖမ်းဆီးရမိခဲ့ပြီး အခြားပြစ်မှုများ ကျူးလွန်ခဲ့ခြင်းရှိ/မရှိ အသေးစိတ်ထပ်မံဆေးခဲ့ရာ ၎င်းတို့ (၂)ဦးသည် ၂၀၂၀ ပြည့်နှစ်၊ ဖေဖော်ဝါရီလမှ ဒီဇင်ဘာလများတွင် မြောက်ဥက္ကလာပမြို့နယ်၊ သန်လျင်မြို့နယ်၊ ဒဂုံမြို့သစ်(ဆိပ်ကမ်း)မြို့နယ်၊ ဒဂုံမြို့သစ်(တောင်ပိုင်း)မြို့နယ်၊ ဒဂုံမြို့သစ်(မြောက်ပိုင်း)မြို့နယ်တို့အတွင်း ဆိုင်ကယ်ဖြင့် လှည့်လည်သွားလာ၍ အမည်မသိ ၄ ဦးထံမှ ဆိုင်ကယ်အမျိုးမျိုး(၄)စီးအား လုယူခဲ့ပြီး လမ်းဘေး၌ရပ်ထားသော ဆိုင်ကယ်အမျိုးမျိုး(၆)စီး ခိုးယူခဲ့ကြကြောင်း ထပ်မံစစ်ဆေးပေါ်ပေါက်ပါသည်။
စစ်ဆေးပေါ်ပေါက်ချက်အရ သက်သေခံပစ္စည်း ဆိုင်ကယ်အမျိုးမျိုး(၁၀)စီးအား ပြန်လည် သိမ်းဆည်း ရရှိပြီးဖြစ်၍ ပြစ်မှုကျူးလွန်သူ ရန်နိုင်(ခ)ကိုနိုင် နှင့် ကျော်သက်ပိုင်(ခ)ဓားနှစ်လက် တို့(၂)ဦးကို ဥပဒေနှင့်အညီ အမြန်တရားစွဲတင်ပို့နိုင်ရေး ဆောင်ရွက်လျက်ရှိကြောင်း သိရသည်။
ဆွေဦး
