စစ်တွေ ဇန်နဝါရီ ၁
ရခိုင်ပြည်နယ်၊ စစ်တွေမြို့နယ် ကျေးတောပိုက်ဆိပ်ဘုန်းကြီးကျောင်းတွင် ခိုလှုံနေသောတိုက်ပွဲရှောင် ဒုက္ခသည်များကို ဒီဇင်ဘာလ(၃၁)ရက်နေ့က ရန်ကုန်မြို့ရှိ ရခိုင်အမျိုးသားလူမှုကယ်ဆယ်ရေးအဖွဲ့က ဆောင်းရာသီ၌ လိုအပ်နေသည့်စောင်နှင့်အနွေးထည်များသွားရောက်လှူဒါန်းခဲ့ကြောင်းသိရသည်။
ကျေးတောပိုက်ဆိပ်ဘုန်းကြီးကျောင်းတိုက်ပွဲရှောင်ဒုက္ခသည်စခန်းသည် ချင်းပြည်နယ် ပလက်ဝ၊ ရခိုင် ပြည်နယ် ဘူးသီးတောင်နှင့် ရသေ့တောင်အစရှိသည့် မြို့နယ်များမှ ဒုက္ခသည် (၁၂၀) ကျော် ခိုလှုံနေသည့် စခန်းဖြစ်ကြောင်းသိရသည်။ ထိုသို့သွားရောက်လှူဒါန်းခဲ့သော ရခိုင်အမျိုးသားများ လူမှုကယ်ဆယ်ရေး အဖွဲ့မှာ ရန်ကုန်မြို့ရှိ အလိုတော်ပြည့်ဘုန်းကြီးကျောင်းကဖွဲ့ထားသည့် လူမှုကယ်ဆယ်ရေးအဖွဲ့ဖြစ်ကြောင်း သိရသည်။
ရန်ကုန်မြို့ရှိအနုပညာရှင်များ၊ အလှူရှင်များအကူအညီဖြင့် ဒီဇင်ဘာလဒုတိယအပတ်ကစတင်ပြီး စစ်တွေမြို့ရှိတိုက်ပွဲရှောင်ဒုက္ခသည်စခန်းများကို တတ်နိုင်သလောက်စုပေါင်း၍ လှူဒါန်းနေခြင်းဖြစ်ကြောင်းအဆိုပါ အကူအညီပေးရာတွင်ပါဝင်သောအဆိုတော် ကိုရိုက်ဒါကပြောသည်။
မြင့်မြတ်အောင်မြင်