လာမည့်ရက်သတ္တပတ်မှစတင်၍ ဗြိတိန်နိုင်ငံတွင် Pfizer ကိုဗစ်ကာကွယ်ဆေး တရားဝင် ထိုးနှံခွင့်ပြု

ဒီဇင်ဘာ ၃၊ လန်ဒန်

လာမည့်ရက်သတ္တပတ်မှစတင်၍ Pfizer ကိုဗစ်ကာကွယ်ဆေးကို တရားဝင် ထိုးနှံခွင့်ပြုမည်ဟု ဗြိတိန်နိုင်ငံက ကြေညာခဲ့သည်။ Pfizer နှင့် BioNTech ဇီဝနည်းပညာကုမ္ပဏီများ ပူးပေါင်းဖော်စပ်ခဲ့သည့် ကာကွယ်ဆေးမှာ COVID-19 ရောဂါကို ၉၅ ရာခိုင်နှုန်းအထိ ကာကွယ်ပေးနိုင်စွမ်း ရှိသည်ဟု ကနဦးရလဒ်များတွင် ဖော်ပြထားသည်။

လာမည့်ရက်သတ္တပတ်မှစတင်၍ Pfizer ကာကွယ်ဆေးကို ထိုးနှံခွင့်ပေးမည်ဟု ဗြိတိန်နိုင်ငံ ဆေးဝါးနှင့် ကျန်းမာရေးဝန်ဆောင်မှု ထုတ်ကုန်ပစ္စည်းများဆိုင်ရာ စည်းမျဉ်းထိန်းသိမ်းရေးအေဂျင်စီ (MHRA) က ပြောသည်။ သက်ကြီးရွယ်အိုများ၊ ရောဂါကူးစက်လွယ်သည့် လူနာများ စသည့် အရေးတကြီးလိုအပ်နေသူများအတွက် မကြာမီရက်ပိုင်းအတွင်း ကာကွယ်ဆေး ထိုးနှံပေးသွားဖွယ်ရှိနေသည်။ ဗြိတိန်နိုင်ငံက Pfizer ကာကွယ်ဆေး အဖုံ သန်း ၄၀ ဝယ်ယူထားရာ ၂ ကြိမ်ထိုးရသည့်အတွက် လူသန်း ၂၀ ကို ကာကွယ်ဆေး ထိုးပေးနိုင်မည်ဖြစ်သည်။

လာမည့်ရက်ပိုင်းအတွင်း ဗြိတိန်နိုင်ငံသို့ ကာကွယ်ဆေး အဖုံ ၈ သိန်း ရောက်ရှိလာမည်ဖြစ်ပြီး အချိန်တိုအတွင်း ကာကွယ်ဆေး အဖုံ ၁၀ သန်း ပို့ဆောင်နိုင်ဖွယ် ရှိသည်။ ဗြိတိန်နိုင်ငံတွင် ဆေးရုံ ၅၀ နီးပါး အသင့်ပြင်ဆင်ထားပြီး ကာကွယ်ဆေးထိုးနှံရေးစင်တာများ တည်ထောင်လျက်ရှိသည်။

Ref:BBC(KNT)