အိန္ဒိယနိုင်ငံ၏ ခေါင်းချင်းဆက်အမြွှာညီအစ်ကိုနှစ်ဦးအနက် တစ်ဦး ကွယ်လွန်

နိုဝင်ဘာ ၂၇၊ နယူးဒေလီ

၂၀၁၇ ခုနှစ်တွင် ခွဲစိတ်ပေးခဲ့သည့် အိန္ဒိယနိုင်ငံမှ ခေါင်းချင်းဆက်အမြွှာညီအစ်ကိုနှစ်ဦးအနက် တစ်ဦး ကွယ်လွန်သွားခဲ့သည်။ အိန္ဒိယနိုင်ငံအရှေ့ပိုင်း သြဒိသပြည်နယ်မှ ဂျာဂါနှင့် ကာလီယာဟု အမည်ရသည့် ညီအစ်ကိုနှစ်ဦးမှာ ခေါင်းချင်းဆက်အမြွှာများဖြစ်ပြီး ၂၀၁၇ ခုနှစ်က အသက် ၂ နှစ်အရွယ်တွင် အကြီးစား ခွဲစိတ်မှုအများအပြား လုပ်ခဲ့ရသည်။

ယင်းတို့နှစ်ဦးမှာ သွေးကြောများနှင့် ဦးနှောက်တစ်သျှူးများ မျှဝေသုံးစွဲနေရသည့် အခြေအနေဖြင့် မွေးဖွားလာခြင်းဖြစ်ပြီး အဆိုပါအခြေအနေမှာ ကလေးမွေးဖွားမှု ၃ သန်းတွင် တစ်ကြိမ်သာ ဖြစ်နိုင်သည်ဟု ဆိုသည်။ အိန္ဒိယနိုင်ငံ၏ ပထမဆုံး ခေါင်းချင်းဆက်အမြွှာ ခွဲစိတ်မှုအဖြစ် ၂၀၁၇ ခုနှစ်က ဒေလီမြို့ရှိ All India Institute of Medical Sciences သိပ္ပံဌာနတွင် ဆရာဝန် ၃၀ ပါသည့်အဖွဲ့က ယင်းတို့ကို ခွဲစိတ်ပေးခဲ့သည်။

ပြီးခဲ့သည့်နှစ်တွင် ယင်းတို့နှစ်ဦးကို သြဒိသပြည်နယ်ရှိ အစိုးရဆေးရုံသို့ ရွှေ့ပြောင်းပေးခဲ့သည်။ အသက် ၅ နှစ်အရွယ်ရှိသည့် ခါလီယာမှာ ပြီးခဲ့သည့်ရက်သတ္တပတ်အထိ ကျန်းကျန်းမာမာ ရှိခဲ့သော်လည်း နောက်ပိုင်းတွင် ကျန်းမာရေးဆိုးရွားလာခဲ့ပြီး သွေးဆိပ်တတ်ခြင်းကြောင့် နာမကျန်းဖြစ်ပြီး ပြီးခဲ့သည့်ဗုဒ္ဓဟူးနေ့က ကွယ်လွန်သွားခဲ့ကြောင်း ဆရာဝန်များက ပြောသည်။

Ref:BBC(KNT)