ဘွန်ဒက်စ်လီဂါက ဒေါ့မွန်အသင်းရဲ့အသက်အငယ်ဆုံးကစားသမားလေး ယူဆွတ်မော်ကိုကို
နိုဝင်ဘာ ၂၅
ဘွန်ဒက်စ်လီဂါဟာ အသက်အငယ်ဆုံးကစားသမားပေါ်ထွန်းရာ လိဂ်တစ်ခုဖြစ်ပါတယ်။ ဘွန်ဒက်စ်လီဂါ ရဲ့ ဒေါ့မွန်အသင်းကတော့ လူငယ်ကစားသမား စင်တင်ပေးရင်း အကျိုးအမြတ်တွေရရှိနေတဲ့အသင်းဆိုရင် မမှားလောက်ပါဘူး။ ယခင်တုန်းက ဘွန်ဒက်စ်လီဂါမှာ အသက်အငယ်ဆုံးကစားသမားက နူရီဆာဟင်ဖြစ်ပြီး အသက် ၁၆ နှစ်၊ ၁၁ လနဲ့ ၁ ရက်ဖြစ်ကာ ၂၀၀၅ ခုနှစ်မှာ နူရင်ဘတ်နဲ့ပွဲမှာ ဒေါ့မွန်တို့ကပဲ ပွဲထုတ်ခဲ့တဲ့ ကစားသမားပါ။ ခုတစ်ခါမှာတော့ ကင်မရွန်းမွေး၊ ဂျာမနီနိုင်ငံသားဟာ ကလပ်ရဲ့ လူငယ် ပွဲ ၈၈ ပွဲကစားပြီး ၁၄၁ ဂိုးသွင်းခဲ့ပြီးဖြစ်ပါတယ်။ ဒေါ့မွန်နည်းပြဖာဗရီက ဟာသာဘာလင်နဲ့ပွဲကို ပွဲပြီးဖို့ ၅ မိနစ်အလိုမှာ မော်ကိုကို ကို ဝင်ရောက်ကစားစေခဲ့တာပါ။ ယူဆွတ်မော်ကိုကို အသင်းမှာဝင်ကစားချိန်ဟာ ၁၆ နှစ်ပြည့်ပြီး နောက်တစ်ရက်မှာ စီနီယာတွေနဲ့အတူ ပွဲထွက်ကစားခွင့်ရခဲ့တာပဲဖြစ်ပါတယ်။ သူ့ရဲ့အနေအထားကိုအကဲခတ် လို့မရပေမယ့် သူ့ရဲ့ခြေစွမ်းကိုတော့ သိထားပြီးဖြစ်ပါတယ်။ ဒီပွဲမှာ ၄ ဂိုးသွင်းခဲ့တဲ့ အာလင်းဟာလန်းက မော်ကိုကို ကို ချီးမွမ်းပြီး သူ့ဆီကနေ နောက်ထပ်ကြီးမားတဲ့အရာတွေ ရရှိလာစရာရှိသေးတယ်လို့ မှတ်ချက် ပေးခဲ့ပါတယ်။ မော်ကိုကိုဟာ အသက် ၁၆ နှစ်တစ်ရက်နဲ့ စီနီယာအသင်းမှာ ပွဲထွက်ခွင့်ရခဲ့တာကြောင့် ဘွန်ဒက်စ်လီဂါသမိုင်းမှာ အငယ်ဆုံးကစားသမားစံချိန်ကို ရရှိခဲ့ပါတယ်။ နည်းပြဖာဗရီပေးတဲ့မွေးနေ့လက်ဆောင်လို့ဆိုရမှာပါ။ ဘွန်ဒက်စ်လီဂါမှာ ယခင်က ၁၆ နှစ်နဲ့ ၆ လရှိမှ ပါဝင်ကစားခွင့်ပြုပေမယ့် ယခုစည်းမျဉ်းသစ်အရ ၁၆ နှစ်ပြည့်ရင် ပါဝင်ကစားခွင့်ပြုခဲ့တာကြောင့် မော်ကိုကို ပါဝင်ကစားခွင့်ရခဲ့တာပါ။ မော်ကိုကိုဟာ ဂျာမန် ယူ−၁၆ နှစ်အသင်းအတွက်လည်း ၄ ပွဲကစား ၃ ဂိုးသွင်းပေးထားပါတယ်။ ဒေါ့မွန် ရဲ့ ယူ−၁၇ နှစ်အသင်းမှာ အသက် ၁၂ နှစ်နဲ့ပါဝင်ကစားနေခဲ့ရင်း ၅၆ ပွဲမှာ ၉၀ ဂိုးသွင်းခဲ့ပါတယ်။ ယူ−၁၉ အသင်းနဲ့အတူ အသက် ၁၄ နှစ်မှာပါဝင်ကစားခဲ့ပြီး ၂၅ ပွဲကစား ၄၇ ဂိုးသွင်းခဲ့တဲ့ မှတ်တမ်းကောင်းတွေပိုင် ဆိုင်ထားသူပါ။
(SO)
