နည်းပြကလော့ရဲ့ ခံစစ်အတွက် အပူမီးနောက်တစ်ခုက အာနိုးလ်ရဲ့ဒဏ်ရာပါ
နိုဝင်ဘာ ၁၀
ပရီးမီးယားလိဂ်ပွဲစဉ် ၈ ပွဲအဖြစ် မန်စီးတီးနဲ့ လီဗာပူးတို့ ယှဉ်ပြိုင်ကစားကြရာမှာ ၁−၁ ရလဒ်နဲ့ သရေကျခဲ့ပါတယ်။ လီဗာပူးလ်အတွက် အဝေးကွင်းဖြစ်တာကြောင့် စိတ်ကျေနပ်စရာတော့ဖြစ်ခဲ့ပါတယ်။ ဒါပေမယ့် စိတ်ပျက်စရာကတော့ အဓိကညာနောက်ခံကစားသမား အာနိုးလ် ဒဏ်ရာရသွားတဲ့ပြဿနာပါပဲ။ လီဗာပူးရဲ့နောက်တန်းက လက်ရှိမှာ ဗန်ဒိုက်၊ ဖာဘင်ဟိုတို့ ဒဏ်ရာရနေတာကနေ ခု အာနိုးလ်ကပါ ထပ်ပြီး ဒဏ်ရာရခဲ့တာပါ။ လီဗာပူးလ်ခံစစ်မှာ ကစားသမား ၆ ဦးသာရှိပြီး ခု ၃ ဦးဒဏ်ရာရတော့ နောက်ပွဲစဉ်တွေအတွက် အခက်အခဲနဲ့ ရင်ဆိုင်ရနိုင်ပါတယ်။ ကံကောင်းတဲ့အချက်တစ်ခုကတော့ လာမယ့်ပတ်မှာ နိုင်ငံပွဲစဉ်တွေ ကစားရမှာဖြစ်တော့ အာနိုးလ်ဒဏ်ရာကိုကုသဖို့ အချိန်ရသွားခဲ့ပါတယ်။
ကလော့က “အာနိုးလ်ရဲ့ဒဏ်ရာကို ဆေးစစ်မှုတွေပြုလုပ်သွားမှာဖြစ်ပြီး အင်္ဂလန်အသင်းရဲ့ ပွဲစဉ်တွေ လွဲချော်မှာပါ။ သူဘာဒဏ်ရာရခဲ့သလဲဆိုတာစစ်ဆေးကြည့်ရဦးမှာပါ။ အာနိုးလ်က အင်္ဂလန်နည်းပြ ဆောက်ဂိတ် မရွေးနိုင်မယ့် ပထမဦးဆုံးကစားသမားတော့ မဟုတ်သလို နောက်ဆုံးကစားသမားလည်းဖြစ်မယ်မထင်ပါဘူး။ မနက်ဖြန်စစ်ဆေးမှုတွေလုပ်ပါ့မယ်။ ပြီးရင်တော့ ဘယ်လောက်အနားယူရမယ်၊ ဘယ်လိုဆေးကုရမယ်ဆိုတာသိရမှာပါ”လို့ ပြောဆိုခဲ့ပါတယ်။
(SO)
