ဂျပန်ဧကရာဇ်၏ ညီကို ထီးနန်းဆက်ခံမည့် အိမ်ရှေ့မင်းသားအဖြစ် တရားဝင် သတ်မှတ်

နိုဝင်ဘာ ၉၊ တိုကျို

တိုကျိုမြို့တွင် ကျင်းပခဲ့သည့် အခမ်းအနားတွင် ဂျပန်ဧကရာဇ် နာရူဟီတို၏ ညီဖြစ်သူ ဖူမီဟီတိုကို ထီးမွေနန်းလျာဆက်ခံမည့် အိမ်ရှေ့မင်းသားအဖြစ် တရားဝင် သတ်မှတ်ကြေညာခဲ့သည်။ နာရူဟီတိုမှာ ပြီးခဲ့သည့်နှစ်တွင် ခမည်းတော် အက်ကီဟီတို ထီးနန်းစွန့်လွှတ်ခဲ့ပြီးနောက် ဂျပန်ဧကရာဇ် ဖြစ်လာခဲ့ပြီး ညီဖြစ်သူ ဖူမီဟီတိုထက် အသက် ၆ နှစ်ကြီးသည်။

ဂျပန်ဘုရင် နာရူဟီတိုတွင် သမီးသာရှိပြီး ထီးနန်းဆက်ခံမည့် သားယောကျ်ားလေးမရှိပေ။ ထီးနန်းအရိုက်အရာ ဆက်ခံရေးတွင် ပြုပြင်ပြောင်းလဲမှုလုပ်ရန် တိုက်တွန်းထား သော်လည်း သမီးမိန်းကလေးကို ထီးနန်းဆက်ခံခွင့်မပြုပေ။ COVID-19 ကပ်ရောဂါ ဖြစ်ပွားနေခြင်းကြောင့် Rikkoshi no rei (ထီးမွေနန်းလျာ ဆက်ခံမည့်သူ အတည်ပြုကြေညာရေး) အခမ်းအနားကို ၇ လကြာ ဆိုင်းငံ့ခဲ့ရသည်။

အဆိုပါအခမ်းအနားကို တော်ဝင် မိသားစုနှင့် ဧည့်သည်တော် ၄၆ ဦး တက်ရောက်ခဲ့ကြပြီး အခမ်းအနား တက်ရောက်လာသူအများစုမှာ နှာခေါင်းစည်းများ တပ်ဆင်ကာ တစ်ဦးနှင့်တစ်ဦး ခပ်ခွာခွာနေခဲ့ကြောင်း ကျိုဒိုသတင်းဌာနက ဖော်ပြသည်။ ဂျပန်ဧကရာဇ် နာရူဟီတိုက ဖူမီဟီတိုကို အိမ်ရှေ့စံမင်းသားအဖြစ် သတ်မှတ်ကြေညာခဲ့ပြီး အသိအမှတ်ပြုဓား ပေးအပ်ခဲ့သည်။

Ref:BBC(KNT)