ပြင်သစ်သမ္မတကို တူရကီသမ္မတက စော်ကားသည့်စကားလုံးသုံးနှုန်းခဲ့ပြီးနောက် တူရကီနိုင်ငံဆိုင်ရာ သံအမတ်ကို ပြင်သစ်နိုင်ငံ ပြန်ခေါ်

အောက်တိုဘာ  ၂၅၊ ပါရီ

တူရကီသမ္မတ အာဒိုဝမ်က ပြင်သစ်သမ္မတ မက်ခရွန်ကို စော်ကားသည့်စကားလုံး သုံးနှုန်းခဲ့ပြီးနောက် တူရကီနိုင်ငံဆိုင်ရာ ပြင်သစ်သံအမတ်ကို ပြင်သစ်နိုင်ငံက ပြန်လည်ခေါ်ယူခဲ့သည်။ လောကီနှုန်းစံတန်ဖိုးများကို ကာကွယ်ပေးပြီး အစွန်းရောက်အစ္စလာမ်ဝါဒကို တိုက်ဖျက်မည်ဟု ကတိပြုခဲ့သည့် မက်ခရွန်မှာ ကျန်းမာရေးစစ်ဆေးမှု ခံယူရန် လိုအပ်နေပြီဟု အာဒိုဝမ်က ပြောခဲ့ခြင်းဖြစ်သည်။ တပည့်များကို တမန်တော် မိုဟာမက်၏ အငြင်းပွားဖွယ် ကာတွန်းပြခဲ့သည့် ပြင်သစ်ကျောင်းဆရာ ခေါင်းဖြတ်သတ်ခံရပြီးနောက် မက်ခရွန်က အဆိုပါအကြောင်းအရာနှင့်ပတ်သက်၍ ပြတ်ပြတ်သားသား ပြောဆိုခဲ့သည်။ ပြင်သစ်နိုင်ငံက ယင်းတို့၏ ကာတွန်းများကို စွန့်လွှတ်မည်မဟုတ်ကြောင်း ယခုရက်သတ္တပတ်အစောပိုင်းတွင် မက်ခရွန်က ပြောသည်။ 

အစ္စလာမ် ထုံးတမ်းစဉ်လာအရ မိုဟာမက်နှင့် အလ္လာ၏ဓာတ်ပုံများကို အတိအလင်း တားမြစ်ထားခြင်းကြောင့် တမန်တော် မိုဟာမက်ကို ပုံဖော်ရေးသားမှုမှာ မွတ်စလင်များကို ပြင်းပြင်းထန်ထန် တိုက်ခိုက်မှု ဖြစ်စေနိုင်သည်။ သို့သော် နိုင်ငံတော်လောကီဝါဒမှာ ပြင်သစ်နိုင်ငံအမျိုးသားအမှတ်သညာ၏ ဗဟိုချက်ဖြစ်သည်။ လူ့အသိုက်အဝန်းတစ်ခု၏ ခံစားချက်ကို ကာကွယ်ပေးရန်အတွက် လွတ်လပ်စွာ ထုတ်ဖော်ပြောဆိုခွင့်ကို တားဆီးပိတ်ပင်ခြင်းမှာ ပြင်သစ်နိုင်ငံ၏ စည်းလုံးညီညွတ်မှုကို ထိခိုက်စေသည်ဟု ပြင်သစ်နိုင်ငံက သတ်မှတ်ထားသည်။ 

အာဒိုဝမ်က မက်ခရွန်ကို ဝေဖန်ခဲ့ပြီးနောက် တိုင်ပင်ဆွေးနွေးစရာများရှိသည်ဟုဆိုကာ ပြင်သစ်နိုင်ငံက တူရကီနိုင်ငံဆိုင်ရာ သံအမတ်ကို ပြန်လည်ခေါ်ယူခဲ့ပြီး မက်ခရွန်နှင့် တွေ့ဆုံဆွေးနွေးစေမည်ဟု ဆိုသည်။ '' အာဒိုဝမ်ရဲ့ မှတ်ချက်တွေက လက်မခံနိုင်စရာပါ။ ရင့်သီးရိုင်းစိုင်းတာက နည်းလမ်းတစ်ခုမဟုတ်ပါဘူး။ ဘက်စုံထောင့်စုံက အန္တရာယ်များနေတဲ့ သူ့ရဲ့မူဝါဒကို ပြောင်းလဲပစ်ဖို့ အာဒိုဝမ်ကို ကျွန်တော်တို့ တောင်းဆိုပါတယ်''ဟု ပြင်သစ်အရာရှိတစ်ဦးက ပြောသည်။                                                                                      Ref:BBC(KNT)