ကမ္ဘာအေးစေတီတော်မြတ်ကြီးအား လာမည့်မေလတွင်လည်း ဆက်လက် ပိတ်ထားမည်
ရန်ကုန် ဧပြီ ၂၈ ရန်ကုန်တိုင်းဒေသကြီး၊ မရမ်းကုန်းမြို့နယ်ရှိ သီရိမင်္ဂလာကမ္ဘာအေးစေတီတော်မြတ်ကြီးအား ဧပြီ လကုန်ပြီးနောက် လာမည့်မေလတွင်လည်း ဆက်လက်ပိတ်ထားမည်ဖြစ်ကြောင်း သက်ဆိုင်ရာ ဘုရား ဂေါပကအဖွဲ့မှ သိရသည်။ ရန်ကုန်မြို့ကြီးတွင် ကိုရိုနာဗိုင်းရပ်စ်ရောဂါ (COVID-19) ကူးစက်ပြန့်ပွားမှုကို တစ်ဖက်တစ်လမ်းမှ တားဆီးကာကွယ်နိုင်စေရန် ရည်ရွယ်ချက်ဖြင့် အဆိုပါ သီရိမင်္ဂလာကမ္ဘာအေးစေတီတော်မြတ်ကြီးအား မြန်မာနှစ်သစ်ကူး ရုံးပိတ်ရက်များဖြစ်သော ဧပြီ ၁၀ ရက်မှ ၁၉ ရက်အထိ အချိန်ပြည့် ပိတ်ထားခဲ့ရာမှ ဧပြီလကုန်အထိ ရက်တိုးမြှင့်ကာ ဆက်လက်ပိတ်ထားကြောင်း သီရိမင်္ဂလာကမ္ဘာအေးစေတီတော် ဂေါပကအဖွဲ့မှ ကြေညာချက်ထုတ်ပြန်ခဲ့သည်။ ယခုတစ်ဖန် နိုင်ငံတော်မှနေ၍ COVID-19 ကာကွယ်ထိန်းချုပ်ရေးနှင့် စပ်လျဉ်းသည့် ကြိုတင် ကာကွယ်ရေးဆိုင်ရာ ကန့်သတ်ချက်များအား ယခု ၂၀၂၀ ပြည့်နှစ်၊ မေလ ၁၅ ရက်အထိ တိုးမြှင့် သတ်မှတ်သည့်နည်းတူ သီရိမင်္ဂလာကမ္ဘာအေးစေတီတော်မြတ်ကြီးအား လာမည့်မေလတွင်လည်း ဆက်လက်ပိတ်ထားမည်ဖြစ်ပြီး ပြန်လည်ဖွင့်လှစ်မည့်ရက်ကို အများပြည်သူသိရှိစေရန် ကြိုတင်အသိပေး ကြေညာသွားမည်ဖြစ်ကြောင်း သီရိမင်္ဂလာကမ္ဘာအေးစေတီတော် ဂေါပကအဖွဲ့မှ တာဝန်ရှိသူတစ်ဦးက ပြောသည်။ ရန်ကုန်မြို့ကြီးတွင် ကိုရိုနာဗိုင်းရပ်စ်ရောဂါ(COVID-19) ကူးစက်ခံရသူဦးရေသည် အခြားဒေသ များထက် ပိုမိုများပြားသောကြောင့် တတ်နိုင်သမျှ ကြိုတင်ကာကွယ်သည့်အနေဖြင့် ယခုကဲ့သို့ သီရိမင်္ဂလာ ကမ္ဘာအေးစေတီတော်မြတ်ကြီးအား ဆက်လက်ပိတ်ထားရန် သက်ဆိုင်ရာ တာဝန်ရှိသူများ ဆွေးနွေးညှိနှိုင်းကာ ဆုံးဖြတ်ဆောင်ရွက်ခြင်းဖြစ်ကြောင်း သိရသည်။ (ဆောင်းဦး)
