ရွှေတိဂုံစေတီတော်ကြီး၏ (၅၇၇) ကြိမ်မြောက် အလှူတော်ငွေပေးအပ်လှူဒါန်းပွဲနှင့် ထုတိအနုမောဒနာ ဂုဏ်ပြုမှတ်တမ်းလွှာ ပေးအပ်ပွဲကျင်းပ
ရွှေတိဂုံစေတီတော် ဘဏ္ဍာ တော်ထိန်းဂေါပကအဖွဲ့က စီစဉ် ကျင်းပသော ရွှေတိဂုံစေတီတော် ကြီး၏ (၅၇၇) ကြိမ်မြောက် အလှူတော်ငွေ ပေးအပ်လှူဒါန်းပွဲ နှင့် အလှူရှင်များအား ထုတိ အနုမောဒနာဂုဏ်ပြုမှတ်တမ်းလွှာ ပြန်လည်ချီးမြှင့်ပွဲ အခမ်းအနားကို မတ် ၃ ရက်၊ မွန်းလွဲ ၁ နာရီက ရွှေတိဂုံစေတီတော်ရင်ပြင်တော် တောင်ဘက်ရှေးဟောင်း ဗုဒ္ဓ ရုပ်ပွားတော်များ တန်ဆောင်းတွင် ကျင်းပခဲ့သည်။ ရှေးဦးစွာ အလှူရှင်များက အလှူတော်ငွေများကို ပေးအပ်လှူဒါန်းရာ ဘဏ္ဍာတော်ထိန်းဂေါပကအဖွဲ့ အလှည့်ကျသဘာပတိ ဒေါက်တာ ရဲအောင်နှင့် ဘဏ္ဍာတော်ထိန်းဂေါပကအဖွဲ့ဝင်များက လက်ခံရယူပြီး ထုတိအနုမောဒနာဂုဏ်ပြုမှတ်တမ်းလွှာများ ပြန်လည်ပေးအပ်ခဲ့သည်။ ဆက်လက်ပြီး ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့ ၏ ဩဝါဒါစရိယဆရာတော် ဘဒ္ဒန္တတိလောကာဘိဝံသ ရွာမပရိယတ္တိ စာသင်တိုက်ဆရာတော်ထံမှ အခမ်းအနားတက်ရောက်လာကြသူများ က ငါးပါးသီလခံယူဆောက်တည်ကြပြီး ရေစက်ချအနုမောဒနာတရား နာယူကာ အခမ်းအနားကိုရုတ်သိမ်းခဲ့သည်။ ယနေ့ပြုလုပ်သော အလှူတော်ငွေပေးအပ်ပွဲ လှူဒါန်းပွဲတွင် ရွှေသင်္ကန်းတော် (ရွှေပြား) အလှူရှင် ၁၁၁ ဦးက ရွှေပြားအချပ်ရေ ၁၄၂ ချပ် ရင်ပြင်တော်အခင်း ကျောက်ပြားအတွက် အလှူရှင်များက ကျောက်ပြားအချပ်ရေ ၅၇၆၂၆ ချပ်၊ လှူဒါန်းခဲ့ကြပြီး ငွေသားအလှူရှင် ၃၀ ဦးအပါအဝင် လှူဒါန်းငွေစုစုပေါင်းကျပ် ၁၅၄၀၁၅၂၉၀ ဖြစ်ကြောင်း သိရသည်။ . အောင်မြင့်ဌေး(မြို့တော်သတင်း)
