မိုးမောက်မြို့နယ်တွင် ငှက်ပျောသီးတင် မော်တော်ယာဉ်တစ်စီး ဘရိတ်ပေါက်၍ လမ်းဘေးထိုးကျမှုဖြစ်ပွား

မိုးမောက် ဧပြီ ၂၅ ကချင်ပြည်နယ်၊ မိုးမောက်မြို့နယ်တွင် ငှက်ပျောသီးတင် မော်တော်ယာဉ်တစ်စီး ဘရိတ်ပေါက်ပြီး လမ်းဘေးထိုးကျမှုဖြစ်ပွားခဲ့ကြောင်း သိရသည်။ ဖြစ်စဉ်မှာ ဧပြီ ၂၅ ရက် နံနက် ၁၀ နာရီခန့်က သုံးမိုင်ကွက်သစ်၊ ဗန်းမော်မြို့နေသူ မောင်းနှင်လာသည့် KCN-2B/---- (၁၂)ဘီး မော်တော်ယာဉ်သည် မိုးမောက်မြို့နယ်၊ ကျောက်စခန်းကျေးရွာအထွက်ဗန်းမော်-မိုးမောက် - လွယ်ဂျယ်သွား ကားလမ်း၊ မိုင်တိုင်အမှတ်(5KM)၊ ခန့်မှန်းမြေပုံအညွှန်း (LG-375812)နေရာအရောက်၌ ဘရိတ်ပေါက်ပြီး ပေ ၈၀ ခန့်အနက်ရှိသော လမ်းအောက်သို့ ပြုတ်ကျခဲ့ပြီး ယင်းမော်တော်ယာဉ် ဦးခေါင်းပိုင်းနှင့် ကိုယ်ထည်ပျက်စီးမှုများဖြစ်ပေါ်ခဲ့သည်။ အဆိုပါ ဖြစ်စဉ်ကြောင့် ယာဉ်မောင်းနှင့် ယာဉ်နောက်လိုက်တို့တွင် ထိခိုက်ဒဏ်ရာများ အသီးသီး ရရှိခဲ့သဖြင့် ဗန်းမော်ပြည်သူ့ဆေးရုံကြီးသို့ တင်ပို့ခဲ့ရကြောင်း၊ ဖြစ်စဉ်နှင့်ပတ်သက်ပြီး မိုးမောက်မြို့မရဲစခန်းက အမှုဖွင့်လှစ် ဆောင်ရွက်သွားမည်ဖြစ်ကြောင်း သိရသည်။ ကျော်ဆန်းမြင့်(ပြန်/ဆက်)